ԵՐԵՎԱՆ, 22 հոկտեմբերի — Sputnik. Նոր խորհրդարանում չորրորդ քաղաքական ուժի առկայությունը կապահովի ժողովրդավարությունը ԱԺ-ում, երկուշաբթի ասաց Հայաստանի վարչապետ պաշտոնակատար Նիկոլ Փաշինյանը՝ մեկնաբանելով Ընտրական նոր օրենսգիրքը։
«Մենք պետք է դուրս գանք տրամաբանության շրջանակից, ըստ որի` օրենքները գրվում են՝ հաշվի առնելով այս կամ այն կուսակցության շահերը։ Դա սխալ մոտեցում է։ Այդ առաջարկը խորհրդարանն ավելի ժողովրդավարական կդարձնի, ավելի ներկայացուցչական», — ասաց Փաշինյանը։
Նրա խոսքով՝ մի կողմից իշխանություններին մեղադրում են միակուսակցական բռնապետություն հաստատելու մեջ, մյուս կողմից Կապանում ՔՊ պարտությունից հետո խոսում են այն մասին, որ ամեն ինչ քանդվում է։ Նման հակասական հայտարարություններն արվում են Ազգային ժողովում չորրորդ հնարավոր ուժի հայտնվելու առնչությամբ։
Մեկնաբանելով ՀՀԿ-ի հնարավոր մասնակցությունը ընտրություններին՝ նա նշեց, որ դա պետք է որոշեն մարդիկ. յուրաքանչյուր ուժ ունի առաջադրվելու իրավունք։
Փաշինյանի քաղաքական ուժի նախընտրական ցուցակներում, նրա խոսքով, հնարավոր է հայտնվեն մարդիկ, որոնք ժամանակին կապված են եղել ՀՀԿ-ի հետ։
«Մենք մեծ խնդիր ունենք կոնսոլիդացնելու, համախմբում իրականացնելու ուղղությամբ: Պետք է փորձ անել՝ պրոֆեսիոնալ մարդկանց առաջ ճանապարհը չփակել: Եկեք հասկանանք, թե ինչպե՞ս Սերժ Սարգսյանը երկար տարիներ կարողացավ պահել իշխանությունը: Եթե նայենք, կհասկանանք՝ պրոֆեսիոնալներին ներգրավելով», — ասաց Փաշինյանը։
Նա նշեց, որ եթե հընթացս կպարզվի, որ այդ մարդիկ քրեորեն հետապնդելի արարք են թույլ տվել, կկանգնեն դատարանի առաջ: