ԵՐԵՎԱՆ, 21 հոկտեմբերի — Sputnik. ՀՀ վարչապետի պաշտոնակատար Նիկոլ Փաշինյանն այսօր Լիբանանի հայ համայնքի հետ հանդիպմանը հերքել է իր մասին տարածված լուրերը։
«Ես իմացա, որ իմ մասին լուրեր կան, թե, իբր իմ ընտանիքը աղանդավորական շարժումների հետ է կապված, ես ինչ–որ աղանդավոր եկեղեցու անդամ եմ։ Առիթից օգտվելով ասեմ, որ կյանքում աղանդավորության հետ որևէ առնչություն չեմ ունեցել, և իմ ողջ ընտանիքը Հայ Առաքելական Եկեղեցու հետևորդներ են»,– ասել է Փաշինյանը` պատասխանելով լիբանանահայ համայնքի ներկայացուցչի` «Նոր Հայաստան, Նոր Հայրապետ» շարժման և Ամենայն Հայոց Կաթողիկոսի հետ Գնդեվանքում տեղի ունեցած միջադեպի մասին հարցին։
Նիկոլ Փաշինյանը նաև հայտել է, որ ինքը պարբերաբար շփվում է Վեհափառ Հայրապետի հետ։ Երկու օր առաջ այցելել ենք նրան` տիկնոջս հետ, թեյ ենք խմել, քննարկել որոշ խնդիրներ»,– հայտնել է Փաշինյանը։
ՀՀ վարչապետի պաշտոնակատարը հայտնեց նաև, որ Գնդեվանքի դեպքից հետո ինքն անձամբ ոստիկանությանը հրահանգել է ապահովել Ամենայն Հայոց Կաթողիկոս Գարեգին Բ–ի անարգել տեղաշարժը։
Հիշեցնենք, հունիսի 6–ից «Նոր Հայաստան, նոր հայրապետ» նախաձեռնությունը Հայաստանում պարբերաբար բողոքի ակցիաներ է անցկացնում Ամենայն Հայոց Կաթողիկոս Գարեգին Բ–ի դեմ` պահանջելով նրա հրաժարականը։
Հուլիսի 14–ին, երբ Գարեգին 2–րդը փորձել էր ուխտագնացություն կատարել Գնդեվանք (Վայոց Ձորի թեմ), նրանք արգելափակել էին ճանապարհը։ Դրանից հետո վարչապետ Նիկոլ Փաշինյանը հայտարարել է, որ չի ցանկանում միջամտել եկեղեցու գործերին, սակայն հանձնարարել է ոստիկանությանը զբաղվել այդ միջադեպով։