ԵՐԵՎԱՆ, 18 հոկտեմբերի — Sputnik. «Հենց Թուրքիան հայտարարեց, որ ձայնագրություն ունի, ԱՄՆ պետքարտուղարը եկավ համոզելու, որ Թուրքիան լուռ մնա»։ Այսպես է մեկնաբանել Միացյալ Նահանգների պետքարտուղար Մայք Պոմպեոյի այցը Թուրքիա Թուրքիայի ընդդիմադիր Ժողովրդադեմոկրատական կուսակցության անդամ, Դիարբեքիրից ընտրված հայազգի պատգամավոր Կարո Փայլանը:
Նա կարծում է, որ Պոմպեոն ամեն բան արել է, որ համոզի երկրի իշխանություններին չբացահայտել կորած սաուդացի լրագրող Ջամալ Խաաշկղիջիի սպանությունն ապացուցող ձայնագրությունները:
«Լրագրողի անհետացման գործը քաղաքական առևտրի առարկա դարձնելն ուղղակի անթույլատրելի է»,- ասել է Փայլանը։
Ավելի վաղ ԱՄՆ նախագահ Դոնալդ Թրամփը հայտարարել էր, որ իրենք պահանջել են Թուրքիայից Խաաշկղիջիի սպանությունն ապացուցող տեսաձայնագրությունները, եթե այդպիսիք կան:
Հիշեցնենք, որ սաուդացի ընդդիմադիր լրագրողն անհետացել է Ստամբուլում Սաուդյան Արաբիայի հյուպատոսություն մուտք գործելուց հետո:
Ըստ Թուրքիայի ոստիկանության վարկածի՝ լրագրողին սպանել են շենքի ներսում: Սաուդյան կողմը, սակայն, հերքում է այդ վարկածն ու պնդում, որ լրագրողը կորել է հյուպատոսության տարածքից դուրս գալուց հետո: