ԵՐԵՎԱՆ, 18 հոկտեմբերի — Sputnik. Հայկական կոնյակը պետք է պաշտպանել կեղծիքներից։ Այս մասին այսօր կառավարության նիստի ժամանակ ասաց ՀՀ վարչապետի պաշտոնակատար Նիկոլ Փաշինյանը։
Նա ավելացրեց, որ կառավարությունը պետք է աջակցի գինի և կոնյակ արտադրողներին՝ նոր շուկաներ մուտք գործելու համար։
Միաժամանակ պետք է հետևել, որ կոնյակի արտադրության մեջ ներմուծված խաղողի (նույնիսկ ոչ խաղողի) սպիրտեր չօգտագործվեն։ Փաշինյանն ընդգծեց, որ նման արտադրանքը կոնյակ չի համարվում ու չի կարող համարվել։ Այն արտասահմանյան գնորդների մոտ կասկած է առաջացնում ու վնասում է հայկական արդյունաբերության հեղինակությանը, հատկապես այնպիսի ճանաչված ապրանքների, ինչպիսին գինին ու կոնյակն են։
Նա ընդգծեց, որ այդ պատճառով էլ խաղողի այգիների մշակման կուլտուրան ևս պետք է բերել պատշաճ մակարդակի։
Հիշեցնենք` Հայաստանի Պետական եկամուտների կոմիտեի տեղեկությունների համաձայն`նախկինում կոնյակի սպիրտի ներմուծումը կոնյակի արտադրության 40%-ն է կազմել։ 2018 թվականի մայիսից հետո ներկրումը շարունակվում է, բայց ավելի փոքր ծավալով (արտադրության 5-6%)։