ԵՐԵՎԱՆ, 18 հոկտեմբերի — Sputnik. ԶԼՄ-ների շուկա դուրս գալու ամենաէժան ու ամենաարագ տարբերակը համացանցի օգտագործումն է`տրաֆիկի հետագա բարձրացմամբ։ Այս մասին Sputnik Արմենիա մուլտիմեդիոն մամուլի կենտրոնում ասաց «Ռոսիա սեգոդնյա» ՄՏԳ-ի տնտեսական և ֆինանսական հարցերով տնօրինության ղեկավար Կիրիլ Կիսելյովը «Մուլդիմեդիոն տեղեկատվական գործակալության գործունեությունը. աշխատանքի կազմակերպում և ֆինանսավորում» կլոր սեղանի ընթացքում։
Հոկտեմբերի 18-ին Sputnik միջազգային տեղեկատվական գործակալությունը և ռադիոն Երևանում գործարկեց SputnikPro կրթական ծրագրի նոր մոդուլը։ Առաջին մասին մասնակցեցին հայկական մի շարք ԶԼՄ-ների ղեկավարներ։
«Շուկա մտնելու ամենահարմար ու էժան տարբերակը համացանցի կիրառումն է` հաճախումների ավելացմամբ։ Դրանից ելնելով` կարելի է աշխատել այն ուղղությամբ, ինչը եկամուտ է բերում», — ասաց Կիսելյովը։
Նա ընդգծեց, որ այս սկզբունքը ընդունելի է ոչ միայն Ռուսաստանի, այլև Հայաստանի համար` հաշվի առնելով երկրի առանձնահատկությունները։
Հայկական լրատվամիջոցների ղեկավարները քննարկման ժամանակ բողոքեցին, որ սոցցանցերում աշխատելու սահմանափակումներ կան։
«Կան մեխանիզմներ, որոնք Հայաստանում ԶԼՄ-ներից շատերը չեն օգտագործում։ Օրինակ` YouTube-ի, Facebook-ի, Twitter-ի հետ աշխատանքը։ Մենք սոցցանցերի առաջարկած հնարավորությունների սահմանափակ քանակություն ենք օգտագործում, մոտ 30-40%-ը», — ասաց Հայաստանի Ժուռնալիստների միության նախագահ Սաթիկ Սեյրանյանը։
«Ավրորա» ռադիոկայանի տնօրեն Միխայիլ Ջանփոլադյանն էլ իր հերթին նշեց, որ հայկական ԶԼՄ-ները YouTube-ում հաճախ են խնդիրների բախվում։ Այս կամ այն պատճառներով YouTube-ը արգելափակում է նյութերը։
«Չկան իրավաբանական գործիքներ, որոնք կկարողանային կարգավորել այդ ամենը», — ընդգծեց նա։
Կիսելյովը պատասխանեց, որ Ռուսաստանում էլ նման խնդիր կա։ Facebook-ը հաճախ արգելափակում է Sputnik-ին։
«Հաշվի առնելով, որ Facebook-ը մենաշնորհ ունի` դժվար է հասկանալ արգելափակման ու արգելափակումից հանելու սկզբունքները։ Սակայն այդ սոցցանցն էական նշանակություն ունի տեղեկության տարածման հարցում», — ասաց Կիսելյովը։
Sputnik-ը խնդիրներ ունի նաև YouTube-ի հետ, սակայն անհնար է հասկանալ` ինչու է ալիքը կոնկրետ տեսանյութը ոչ կոռեկտ համարում։
Կիսելյովը ներկայացրեց նաև Sputnik-ի գործունեությունը։ Ազգային գործակալությունները գործում են ամբողջ աշխարհում։ Խոշոր խմբագրություններ կան Մեծ Բրիտանիայում, ԱՄՆ-ում։ 2019 թվականին նախատեսվում է գործունեություն ծավալել Հարավարևելյան Ասիայի երկրներում։
Միաժամանակ գործակալության ֆինանսավորման 90%-ն իրականացվում է Ռուսաստանի պետբյուջեի հաշվին, իսկ 10%-ը կոմերցիոն գործունեության արդյունքում։
Հիշեցնենք` SputnikPro ծրագիրն իր առաջին կրթական սեմինարն անցկացրել է ապրիլի 10-ին։
Sputnik Արմենիան գործունեությունը սկսել է 2015 թվականի հուլիսին և Sputnik միջազգային նախագծի մի մասն է կազմում։ Գործակալության պորտալը ներառված է երկրի առաջատար առցանց ԶԼՄ-ների լավագույն հնգյակում։
Sputnik-ը լրատվական գործակալություն և ռադիո է` տասնյակ երկրներում մուլտիմեդիոն տեղեկատվական ներկայացուցչություններով: Sputnik-ը ներառում է ավելի քան 30 լեզվով կայքեր, անալոգային և թվային ռադիոհեռարձակում, բջջային հավելվածներ և էջեր սոցիալական կայքերում։ Sputnik-ի լուրերը շուրջօրյա ռեժիմով թողարկվում են անգլերեն, արաբերեն, իսպաներեն և չինարեն: