ԵՐԵՎԱՆ, 15 հոկտեմբերի — Sputnik. Ռուս սահմանապահները հերթական անգամ կասեցրել են հայ-թուրքական սահմանը հատելու փորձը։ Այս մասին հայտնում է Հայաստանում ՌԴ դաշնային անվտանգության ծառայության սահմանապահ վարչության մամուլի ծառայությունը։
«2018թ-ի հոկտեմբերի 14-ին Արտաշատի սահմանապահ ջոկատներից մեկում պետական սահմանի պահպանության տեխնիկական միջոցներից տագնապի ազդանշան է հնչել», — նշված է հաղորդագրությունում:
Տագնապի ազդանշանը ստանալուց մի քանի րոպե անց դեպքի վայր է հասել սահմանապահների տագնապային խումբը և հայտնաբերել դեպի Հայաստանի Հանրապետության տարածք խորացող հետքեր:
Որոնողական աշխատանքներին մասնակցել է ծառայողական շունը, որը կարճ ժամանակում հայտնաբերել է սահմանախախտին:
Սահմանապահները նրա մոտ անձը հաստատող փաստաթղթեր չեն հայտնաբերել: Նախնական տեղեկություններով` սահմանախախտը Իրանի Իսլամական Հանրապետության քաղաքացի է: Նա հայտնել է, որ սահմանը հատել է զինվորական ծառայությունից խուսափելու համար:
Սահմանախախտին հանձնել են Հայաստանի իրավապահ մարմիններին։