ԵՐԵՎԱՆ, 15 հոկտեմբերի — Sputnik. ԱԺ պատգամավոր, գեներալ–լեյտենանտ Մանվել Գրիգորյանը կալանքի ժամկետը 2 ամսով երկարաձգվել է։
Ինչպես Sputnik Արմենիայի հետ զրույցում ասաց Գրիգորյանի փաստաբան Արսեն Մկրտչյանն Երևանի ընդհանուր իրավասության դատարանը այսօր է որոշում կայացրել երկու ամսով երկարաձգել Մանվել Գրիգորյանի կալանքի ժամկետը: «Բայց մենք մտադիր ենք այս որոշումը բողոքարկել։ Որովհետև դատարանը հաշվի չի առել այն հանգամանքը, որ մեր պաշտպանյալը մի շարք ծանր հիվանդություններ ունի»,–ասաց Մկրտչյանը։
Դատարանը նաև մերժել է Գրիգորյանի պաշտպանների՝ նրա խափանման միջոց կալանավորումը գրավով փոխարինելու վերաբերյալ միջնորդությունը:
Նշենք, որ Մանվել Գրիգորյանի նկատմամբ նշանակված բժշկական փորձաքննության արդյունքում նրա մոտ հայտնաբերվել է 16-ից ավելի հիվանդություն, այդ թվում` քաղցկեղ և շաքարային դիաբետ։ Այս մասին Sputnik Արմենիայի հետ զրույցում հայտնել էր նրա փաստաբան Արսեն Մկրտչյանը։
Հիշեցնենք, որ Մանվել Գրիգորյանը կալանավորված է հունիսի 19-ից: Նրան մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար: