ԵՐԵՎԱՆ, 14 հոկտեմբերի – Sputnik, Դավիթ Գալստյան. Հայաստանի երկրորդ նախագահ Ռոբերտ Քոչարյանը հասկացել է, որ չի հասցնում պատվաստվել արտահերթ խորհրդարանական ընտրություններին։
Այս մասին Sputnik Արմենիայի հետ զրույցում ասաց քաղտեխնոլոգ Կարեն Քոչարյանը՝ մեկնաբանելով նախկին նախագահի հարցազրույցը Bloomberg գործակալության հետ։
«Ռոբերտ Քոչարյանը չափազանց փորձառու քաղաքական գործիչ է։ Նիկոլ Փաշինյանի ուղիղ եթերի ու հոկտեմբերի 2-ի իրադարձություններից հետո, երբ ժողովուրդը փողոց դուրս եկավ, նա շատ ճիշտ գնահատեց իրավիճակը։ Քոչարյանը հասկացավ, որ երկու ամսվա ընթացքում հնարավոր չէ ստեղծել մի ուժ, որը կկարողանա պայքարել այդ վարկանիշի դեմ», — ասաց քաղտեխնոլոգը։
Նրա խոսքով՝ նախկին նախագահը «չի սիրում պարտվել», այդ պատճառով նա ոչ մի ձևաչափով չի մասնակցի ընտրություններին։
Հետագայում նա նոր ուժ կամ որևէ դաշինք կստեղծի, բայց առանց իր ֆորմալ առաջնորդության։ Երբ նա հայտարարեց, որ քաղաքականություն է վերադառնում, ամենայն հավանականությամբ, այդ պահից նա դիտարկումներ էր անում հասարակական կարծիքի ոլորտում։
«Հասկանալով, որ ընտրազանգվածի առումով նա շատ քիչ պաշարներ ունի, Քոչարյանը ճիշտ է գնահատել իրավիճակն ու հայտարարություն է արել Bloomberg-ի հետ հարցազրույցում։ Նա գիտակցել է, որ կարող է օգտագործել ունեցած պաշարները՝ այլ առաջնորդ առաջադրելով», — ասաց Քոչարյանը։
Դեռ հասկանալի է չէ՝ արդյո՞ք նա հիմնվելու է նախորդ ուժերի վրա նոր դեմքերով։ Սակայն քաղտեխնոլոգը չի կասկածում, որ նոր դեմքեր են լինելու։
«Հին քաղաքական դաշտը, այդ թվում՝ և՛ իշխանական, և՛ ընդդիմադիր, և՛ այլընտրանքային վերաձևավորման կարիք ունի», — ասաց Քոչարյանը։
Նախորդ իշխանությունները հասկացան դա, բայց արդեն ուշ էր։ Իրավիճակը այլ կլիներ, եթե մայիսի 8-ին ՀՀԿ-ն նոր առաջնորդի ընտրեր, Դաշնակցությունում գիտակցեին, որ չի կարելի 25-30 տարի նույն դեմքերով ղեկավարել, ԲՀԿ-ում հասկանային, որ իրենք ոչ թե բիզնես-նախագիծ են, այլ քաղաքական ուժ։
«Արդեն բոլորը հոգնել են այդ դեմքերից։ Եթե հասկանային դա մայիս-հունիսին, հնարավոր է, կարողանային պայքարել», — նշեց քաղտեխնոլոգը։
Ավելի վաղ ՀՀ երկրորդ նախագահ Ռոբերտ Քոչարյանը Bloomberg-ի հետ հարցազրույցում հայտարարել էր, որ չի մասնակցելու արտահերթ խորհրդարանական ընտրություններին ու չի պատրաստվում վարչապետ դառնալ։
ՀՀ վարչապետ Նիկոլ Փաշինյանն իր հերթին հայտարարել էր, որ արտահերթ խորհրդարանական ընտրությունները կարող են կայանալ դեկտեմբերի 9-10-ին, իսկ մինչ այդ նա հրաժարական կտա։
Հիշեցնենք, որ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել «Մարտի 1»-ի գործով վկայի կարգավիճակով՝ հարցաքննության։ Նույն օրը նրան մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։
Առաջին ատյանի դատարանը Ռոբերտ Քոչարյանին կալանավորելու միջնորդությունը բավարարել էր, իսկ Վերաքննիչ դատարանը Քոչարյանին ճանաչել է անձեռնմխելի, ինչի արդյունքում նա ազատ էր արձակվել կալանքից:
Այնուհետև որոշ ժամանակ անց ՀՔԾ քննիչը որոշում է կայացրել Ռոբերտ Քոչարյանի նկատմամբ խափանման միջոց ընտրել ստորագրությունը չհեռանալու մասին: