ԵՐԵՎԱՆ, 13 հոկտեմբերի — Sputnik. Շքեղ զգեստով գեղեցկուհի հարսնացուն հարսանիքի օրը գնացել է իր սիրելիի գերեզման: Սա կարծես Թիմ Բերտոնի ֆիլմը լինի, սակայն ամերիկյան մի զույգի պատմություն է, որը ներկայացրել է The Sun պարբերականը:
Ջեսիկա Պաջեթը, որը սեպտեմբերի 29-ին պետք է ամուսնանար հրշեջ Քենդալ Ջեյմս Մերֆիի հետ, որոշել է ֆոտոսեսիա կազմակերպել հարսանիքի օրը: Անսովոր և տխուր ֆոտոսեսիայի լուսանկարները հայտնվել են Facebook-ում և մեծ արագությամբ տարածվել՝ հուզելով մարդկանց:
Աղջկանից բացի գերեզմանատուն են գնացել զույգի մտերիմները և բարեկամները: Նրանք օգնում են աղջկան թեթև տանել սարսափելի վիշտը: Մերֆին պաշտել է իր աշխատանքը, իսկ գործընկերները շատ են գնահատել տղային: Սակայն նրանցից մեկի մեղքով փեսացուն մահացել է:
Մերֆիին վրաերթի է ենթարկել գործընկերը, երբ նրանք կանչի գնալիս են եղել: Տղան մահացել է մարդու մեղքով, որը հարբած վիճակում նստել է ղեկին: Նրան կալանավորել են դեռ անցած տարի, բայց մինչև հիմա դատարանը վճիռ չի կայացրել:
Փեսացուի շիրիմի ֆոնին ֆոտոսեսիան կարող է շատ շոկային թվալ: Բայց Ջեսիկայի համար դա դարձել է ցավը «մեղմելու» միջոց: Այսպես նա նաև փորձել է աշխարհին ցույց տալ, թե ինչպիսի հիանալի մարդ է եղել իր սիրելին: