ԵՐԵՎԱՆ, 11 հոկտեմբերի — Sputnik. Բանկային ավանդներն աճում են, որովհետև փող ունեցողները չգիտեն` այդ փողով ինչ անեն:
Sputnik Արմենիայի հետ զրույցում, մեկնաբանելով բանկերում ավանդների ավելացման մասին վարչապետ Նիկոլ Փաշինյանի ֆեյսբուքյան գրառումը, ասել է Ինովացիոն և ինստիտուցիոնալ հետազոտությունների կենտրոնի ղեկավար, տնտեսագետ Ատոմ Մարգարյանը:
Ընդ որում, ավանդների հաշվեկշռում հիմանականը իրավաբանական անձանց ավանդային հաշիվների ծավալների մեծացումն է: Այս ցուցանիշով էլ, ըստ տնտեսագետի պայմանավորվել է տնտեսության մեջ վարչապետի հիշատակած աշխուժության մեծացումը:
«Դա նշանակում է, որ ներդրողները ներդրումների հարցում վերապահումներ ունեն, և այլընտրանքը, թերևս, բանկում այդ միջոցները պահելն է` մինչև կգան լավ ժամանակներ»,- ասում է տնտեսագետը:
Իսկ լավ ժամանակների սպասումը,Ատոմ Մարգարյանի համոզմամբ, պայմանավորված է ընթացիկ քաղաքական իրավիճակով`կառավարություն-խորհրդարան պայքար, արտահերթ ընտրությունների, նոր խորհրդարանի ու նոր կառավարության ձևավորման սպասումներ:
«Պետք է հանգուցալուծվի այդ կոնֆլիկտը, որպեսզի ներդրողների համար ավելի հանգիստ ու բնականոն պայմաններ ստեղծվեն որոշումներ կայացնելու համար»,- նշում է Ատոմ Մարգարյանը:
Հիշեցնենք, վարչապետ Նիկոլ Փաշինյանը ֆեյսբուքում գրառում էր կատարել՝ նշելով, որ Հայաստանը տնտեսական թռիչքի համար թափ է հավաքում:
Ըստ նրա` մայիսից ի վեր բանկային համակարգի ակտիվներն աճել են 10.5 տոկոսով. Վարկերը` 7, բանկային ավանդները` 9.2 տոկոսով: