ԵՐԵՎԱՆ, 11 հոկտեմբերի — Sputnik. ՀՀ Ազգային ժողովի նախագահ Արա Բաբլոյանն այսօր ընդունել է ՌԴ Պետական դումայի նախագահի տեղակալ Սերգեյ Նևերովի գլխավորած պատվիրակությանը:
Ինչպես հայտնում են Աժ տեղեկատվության և հասարակայնության հետկապերի վարչությունից, Ազգային ժողովի նախագահը, բարձր գնահատելով երկկողմ հարաբերությունների ներկա մակարդակը, կարևորել է խորհրդարանական դիվանագիտության դերը և ընդգծել միջխորհրդարանական կապերի ամրապնդման կարևորությունը:
Խոսելով ներհայաստանյան իրադարձություններից՝ օրենսդիր մարմնի ղեկավարը հավաստիացրել է, որ մեր երկրում տեղի ունեցած փոփոխությունները որևէ կերպ չեն ազդել Հայաստանի և Ռուսաստանի միջև գոյություն ունեցող ռազմավարական փոխգործակցության ու բարեկամական հարաբերությունների վրա: Իսկ Հայաստանում գոյություն ունեցող ներքաղաքական հարցերի շուրջ որոշումները «Բաբլոյանի խոսքով, պետք է կայացվեն քաղաքական քննարկումների և փոխհամաձայնության շրջանակում:
Սերգեյ Նևերովը, շնորհակալություն հայտնելով ջերմ ընդունելության համար, համոզմունք է հայտնել, որ երկու ժողովուրդների դարավոր բարեկամությունն ու դաշնակցային հարաբերությունները կշարունակվեն ընդլայնվել:
Նա ևս արժևորել է հայ-ռուսական միջխորհրդարանական հարաբերությունների զարգացումն ու խորացումը, համագործակցությունը ՀԱՊԿ ԽՎ եւ ԱՊՀ ՄԽՎ շրջանակում:
Զրուցակիցները քննարկել են հոկտեմբերի 29-30-ը Երևանում անցկացվելիք ՀԱՊԿ ԽՎ խորհրդի և վեհաժողովի լիագումար նիստերի անցկացմանը վերաբերող օրակարգային հարցեր: Արա Բաբլոյանը հյուրերին վստահեցրել է, որ Հայաստանի Ազգային ժողովը պատրաստ է բարձր մակարդակով կազմակերպել նիստերի անցկացումը: