ԵՐԵՎԱՆ, 8 հոկտեմբերի — Sputnik. Սյունիքի նախկին մարզպետ Սուրիկ Խաչատրյանի առանձնատան շինարարության վերաբերյալ քրեական գործ է հարուցվել քաղաքապետարանի ներկա ու նախկին պաշտոնյաների նկատմամբ։ Այս մասին հայտնում է ՀՀ գլխավոր դատախազության պաշտոնական կայքը։
Գործը հարուցվել է ՀՀ քրեական օրենսգրքի 308-րդ հոդվածի 1-ին մասի հատկանիշներով՝ պաշտոնատար անձի կողմից շահադիտական, անձնական այլ շահագրգռությունից ելնելով ծառայողական պարտականությունները չկատարելու փաստով։ Նախաքննությունը հանձնարարվել է ՀՀ քննչական կոմիտեին:
Ըստ դատախազության, իրականացված ուսումնասիրությունների արդյունքում պարզվել է, որ Երևանի քաղաքապետարանի պաշտոնատար անձինք չեն կատարել «Քաղաքաշինության մասին» ՀՀ օրենքով սահմանված ծառայողական պարտականությունները, այն է` չեն տուգանել առանց թույլտվության առանձնատուն կառուցողին, տվյալ դեպքում` Սյունիքի նախկին մարզպետին։
Դատախազությունը հաշվարկել է, որ առանձնատան արժեքը 357 մլն դրամ է, հետևաբար դրա 1 տոկոսի չափով տուգանքը պետք է կազմեր 3.570.870 դրամ։
Ասել է թե` այս չափով նյութական վնաս է պատճառվել Երևան համայնքին։
Նշենք, որ քրեական գործը հարուցվել է «Հետք» էլեկտրոնային թերթում 2018թ. օգոստոսի 24-ին հրապարակված «Սուրիկ Խաչատրյանն իր առանձնատունը 8 տարի կառուցել է առանց շինթույլտվության» վերտառությամբ հրապարակման մեջ նշված հանգամանքներն ուսումնասիրելու ընթացքում բացահայտված խախտումների հիման վրա: