ԵՐԵՎԱՆ, 8 հոկտեմբերի — Sputnik. Այսօր մեկնարկել է հայ-ռուսական համատեղ զորավարժությունը: Այս մասին տեղեկացնում է ՀՀ ՊՆ մամուլի ծառայությունը։
«Տարբեր մարտատեսակներում խնդիրների լուծման, վճռական գործողությունների ընթացքում ստորաբաժանումները ներդաշնակելու և մարտական պատրաստականությունը ստուգելու, զինծառայողների բարձր բարոյակամային, մարտական և հոգեբանական հատկությունների ձևավորման նպատակով հոկտեմբերի 8-ից 13-ը «Բաղրամյան» զորավարժադաշտում մեկնարկել է հայ-ռուսական համատեղ զորավարժությունը»,–ասված է հայտարարության մեջ։
Զորավարժության թեման է «Զորամասերի և ստորաբաժանումների բերումը մարտական պատրաստականության աստիճանի: ՀՀ պետական սահմանի պահպանության ուժեղացում, ՀՕՊ ուժերի ու միջոցների կիրառում, պաշտպանողական մարտի նախապատրաստում և վարում»:
Նշվում է, որ զորավարժության հրամանատարն է, գեներալ-մայոր Տիգրան Փարվանյանը: