Ֆրանսիական նամակների վրա Սարյանի ու Գառզուի նկարներով նամականիշներ կհայտնվեն

Երևանում Ֆրանկոֆոնիայի ֆորումին ներկայացվել է հայ դասականների նկարներով նամականիշները։
Sputnik

ԵՐԵՎԱՆ, 8 սեպտեմբերի – Sputnik. Մշակույթների երկխոսությունը Ֆրանկոֆոնիայի անբաժան ու Հայաստանի համար շատ կարևոր մասն է։ Այս մասին այսօր լրագրողներին ասաց ՀՀ արտգործնախարար Զոհրաբ Մնացականյանը Երևանում անցկացվող Ֆրանկոֆոնիայի նախարարական համաժողովի ժամանակ։

Այսօր մարվեց և շրջանառության մեջ դրվեց մեկ նամականիշով գեղաթերթիկ՝ «Ֆրանկոֆոնիայի միջազգային կազմակերպության գագաթնաժողովը Երևանում» թեմայով: Գեղաթերթիկի վրա պատկերված են Մարտիրոս Սարյանի ու ֆրանսիահայ նկարիչ Գառզուի (Գառնիկ Զուլումյան) նկարների հատվածները։

Մնացականյան. Ֆրանկոֆոնիան կանդրադառնա չլուծված հակամարտություններին

Նամականիշների նոր շարքի առաջին կնիքները դրեցին Ֆրանկոֆոնիայի միջազգային կազմակերպության գլխավոր քարտուղար Միկաել Ժանը, ՀՀ արտգործնախարար Զոհրաբ Մնացականյանը, տրանսպորտի ու կապի նախարար Հակոբ Արշակյանը, «Հայփոստի» գլխավոր տնօրեն Խուան Պաբլո Գեչիջյանը։

«Ֆրանկոֆոնիան մեր երկրի համար նաև այլ երկրների մշակույթների հետ ծանոթանալու հնարավորություն է։ Հայաստանը միշտ կարևորել է դա։ Մենք մեր հերթին ուրախ ենք ներկայացնել մեր դասականների մշակույթն ու արվեստը», – ասաց Մնացականյանը։

Հիշեցնենք՝ հոկտեմբերի 11-12 –ին Երևանում կայանալիք Ֆրանկոֆոնիայի գագաթնաժողովին ժամանելու են Ֆրանսիայի նախագահ Էմանուել Մակրոնը, Կանադայի ու Բելգիայի վարչապետներ Ջասթին Տրյուդոն ու Շարլ Միշելը, նաև բարձր մակարդակի պատվիրակություններ աշխարհի տասնյակ երկրներից։