ԵՐԵՎԱՆ, 7 հոկտեմբերի — Sputnik. Իրավապահները Հարություն Ղարագյոզյանին՝ Կարամելի Հարութին սպանված են գտել:
Sputnik Արմենիայի հետ զրույցում այս լուրը հաստատեց ՀՀ Քննչական կոմիտեի նախագահի խորհրդական Սոնա Տռուզյանը: Նա փոխանցեց, որ նախկին պատգամավորի դին հայտնաբերվել է Երևանից 10 կմ հեռավորության վրա գտնվող մի արտադրամասում:
Դիակի վրա եղել է հրազենային վնասվածք:
Ավելի ուշ տեղեկատվություն տարածեց նաև ՀՀ Ոստիկանության հասարակայնության հետ կապերի և լրատվության վարչության լրատվամիջոցների հետ կապերի բաժնի ղեկավար Էդգար Ջանոյանը: Ըստ նրա՝ այսօր (հոկտեմբերի 7-ին), Դավիթաշենի 2-րդ թաղամասում գտնվող քարի արտադրամասում գտնվող շինության մեջ հայտնաբերվել է Հ․ Ղարագյոզյանի դին՝ գլխին հրազենային վնասվածքով։ Մահացածի աջ ձեռքում եղել է ատրճանակ։
Հիշեցնենք, որ երեկ ուշ գիշեր ՀՀ Ոստիկանությունը տեղեկատվություն տարածեց, որ հոկտեմբերի 6-ին ժամը 22-ն անց 40-ի սահմաններում ոստիկանության Կենտրոնականի բաժին ահազանգ է ստացվել, որ Նորք Մարաշի Արմենակյան փողոցում գտնվող հացատներից մեկում կրակոցներ են։ Րոպեներ անց ոստիկանության Կենտրոնական բաժին ահազանգեր են հնչել Երևանի տարբեր բժշկական կենտրոններից։
Դեպքի վայրում հայտնաբերվել են պարկուճներ և ատրճանակ։ Ձեռնարկված օպերատիվ-հետախուզական միջոցառումների և քննչական գործողությունների արդյունքում պարզվել է հանցագործությունը կատարելու մեջ կասկածվողի ինքնությունը: