ԵՐԵՎԱՆ, 4 հոկտեմբերի — Sputnik. Ապահովագրական ընկերությունը համարում է, որ Փարիզում տեղի ունեցած աղմկահարույց կողոպուտի մեղավորը հեռուստաաստղ Քիմ Քարդաշյանի թիկնապահ Պասկալ Դուվյեն է։ Այս մասին հայտնում է super.ru պարբերականը։
Քարդաշյանին կողոպտել էին Փարիզում 2016 թվականի հոկտեմբերի 3-ին, չարագործները մի քանի միլիոն դոլարի զարդեր էին գողացել։
Նշվում է, որ հիմա թիկնապահը պետք է պատասխան տա դատարանի առաջ, նա, ամենայն հավանականությամբ ստիպված կլինի 6,1 միլիոն դոլար վճարել։
Ապահովագրական ընկերությունն այդ ահռելի գումարն արդեն վճարել է Քարդաշյանին Փարիզի հյուրանոցից գողացված զարդերի համար։
Այն ժամանակ հեռուստաաստղն ասել էր, որ դժոխքի միջով է անցել, երբ զինված մարդիկ ներխուժել են սենյակ, կապել իրեն ու գողացել զարդերը։
Այդ ընթացքում նրա թիկնապահը Քենդալ Ջեներին ու Քորթնի Քարդաշյանին ուղեկցել է գիշերային ակումբ։
Բացի այդ, ապահովագրական ընկերությունն ասել է, որ Քարդաշյանի թիկնապահը ևս մի քանի սխալ է արել։ Բանն այն է, որ հյուրանոցի դարպասը կողպեք չի ունեցել, իսկ ինտերքոմը չի աշխատել։
Հյուրանոցի դռնապանը, որին ստիպել են բացել Քարդաշյանի սենյակի դուռը, հայցում չի հիշատակվում, բայց նրան նույնպես քննադատել են, որ նա անվտանգության միջոցների հրահանգում չի անցել։
Նշենք, որ ոստիկանների բռնած գողերը Քարդաշյանի երթուղուն հետևել էին սոցցանցերում, որտեղ Քարդաշյանը ցուցադրել էր իր զարդերը։
Միաժամանակ կողոպուտից հետո Քարդաշյանը հայտարարել էր, որ իր թիկնապահի դեմ բողոք չունի։