ԵՐԵՎԱՆ, 4 հոկտեմբերի — Sputnik. Ռուս գործարարները հայ գործընկերներից հարյուր միլիոն դոլարանոց առաջարկների են սպասում։ Այս մասին հայտնեց Եվրասիական տնտեսական միության (ԵԱՏՄ) գործարարական խորհրդի նախագահ Ստանիսլավ Նաումովը։
ԵԱՏՄ ներկայացուցիչը Երևանին «տնային աշխատանք» է տվել Հայաստանում հոկտեմբերի 22–24 կայանալիք «Եվրասիական շաբաթ» ամենամյա միջազգային ֆորումին ընդառաջ անցկացվող մամուլի ասուլիսի ժամանակ։ Նա առաջարկեց հայ գործարարներին ռուսական շուկայի համար գործնական առաջարկներ պատրաստել։
«Հիմա միության անդամ երկրների ներքին մթերային շուկայի ծավալը 8 միլիարդ դոլար է, սակայն մենք ուզում ենք մեծացնել այն հարյուր միլիոն դոլարով` դա «Եվրասիական շաբաթի» հստակ խնդիրն է։ Ֆորումին ռուսական առևտրային ցանցերի բազում ներկայացուցիչներ են լինելու։ Նրանք մեր հայ գործընկերների առաջարկներին են սպասելու։ Մենք ուզում ենք որակյալ ու մատչելի ապրանքներ տանել Հայաստանից Ռուսաստան», – նշեց նա։
Բացի այդ, Նաումովն ասաց, որ ֆորումի մասնակիցներին մթերային շուկայի մասնակցների բարեխիղճների պրակտիկ կանոնակարգ կներկայացնեն։ Այդ կանոնակարգը եվրասիական գործարարների ինքնակարգավորման գործիք կդառնա։ Խոսնակն ընդգծեց, որ եվրասիական ինտեգրումը պետք է բխի բիզնեսի շահերից։
«Ցավոք, մենք այդ դաշտում միայն առաջին քայլերն ենք անում։ ֆորումի ընթացքում պետք է բացեիբաց խոսել ԵԱՏՄ մասնակից երկրների շուկաներում հայ գործարարների հակասությունների ու խնդիրների մասին», – ասաց Նաումովը։
«Եվրասիական շաբաթ» ֆորումի մասնակցությունն անվճար է։ Գրանցումը տեղի է ունենում eurasianweek.com կայքում։
«Եվրասիական շաբաթ» գործարար համաժողովն իրականացվում է ամենամյա պարբերականությամբ, Եվրասիական տնտեսական հանձնաժողովի նախաձեռնությամբ, ՀՀ տնտեսական զարգացման և ներդրումների նախարարության և «Բիզնես Արմենիա» հիմնադրամի աջակցությամբ։