ԵՐԵՎԱՆ, 4 հոկտեմբերի — Sputnik. Հայաստանի կառավարությունը մտադիր է քրեական պատիժ սահմանել միջազգային ահաբեկչության հրապարակային կոչերի, ահաբեկչությունը հրապարակայնորեն արդարացնելու ու քարոզելու դիմաց։
Քրեական օրենսգրքում համապատասխան փոփոխության նախագիծն այսօր կառավարության նիստում ներկայացնելով` ՀՀ արդարադատության նախարար Արտակ Զեյնալյանը նշեց, որ գործող օրենսգիրքը քրեական պատասխանատվություն է նախատեսում միայն ահաբեկչության հրապարակային կոչերի համար։
«Ժամանակակից տեխնիկական առաջընթացի պայմաններում հրապարակայնորեն (այդ թվում՝ զանգվածային հաղորդակցության միջոցներով) ահաբեկչական գործողությունների կատարման կոչերը հանրային մեծ վտանգ են ներկայացնում»,- խոսելով քրեականացման նախագծի անհրաժեշտության մասին` ասաց Զեյնալյանը։
Նախարարը հայտնեց, որ նշված հանցանքների համար կսահմանվեն տուգանքներ՝ նվազագույն աշխատավարձի հինգհարյուրապատիկից հազարապատիկի չափով։
«Առանձին դեպքերում կկիրառվի նաև ազատազրկում` առավելագույնը երեք տարի ժամկետով»,- ասաց նա:
Կառավարությունը հավանություն տվեց ներկայացված նախագծին և այն ներկայացրեց խորհրդարան` հետագա քննարկման ու ընդունման համար։