ԵՐԵՎԱՆ, 2 հոկտեմբերի — Sputnik. ՀՅԴ-ն վարչապետ Նիկոլ Փաշինյանի հետ հանդիպման առաջարկ չի ստացել։ Այս մասին այսօր ԱԺ–ում լրագրողներին հայտնեց ԱԺ ՀՅԴ խմբակցության ղեկավար Արմեն Ռուստամյանը:
Բայց անկախ դրանից, Ռուստամյանը նշեց, որ իրենք միշտ ասել են ու հիմա էլ պնդում են, որ կողմ են արտահերթ խորհրդարանական ընտրություններին։
«Բայց դեմ ենք դրանց անհապաղ անցկացմանը: Մեր կարծիքով՝ դա պետք է տեղի ունենա այն անհրաժեշտ քայլերը կատարելու տրամաբանությամբ, որոնց համար բավարար ժամանակ է անհրաժեշտ»,- ասաց Ռուստամյանը։
Անհրաժեշտ քայլերն, ըստ ՀՅԴ–ի, հետևյալն են` արտահերթ խորհրդարանական ընտրությունները պետք է անցնեն նոր Ընտրական օրենսգրքով, որում չլինի ռեյտինգային համակարգ և երկրորդ` մինչ այդ ոստիկանությունը պետք անկախ մարմնի կարգավիճակ ստանա։ Երրորդ պայմանն այն ժամանակն է, որ անհրաժեշտ է նշված քայլերն իրականացնելու համար։
Այդ ժամանակը, ՀՅԴ հաշվարկով, առնվազն 1 տարի է։