ԵՐԵՎԱՆ, 1 հոկտեմբերի – Sputnik. Հանրահայտ երգիչ և երգահան Շառլ Ազնավուրը մահացավ։ Այս մասին հայտնում են ֆրանսիական լրատվամիջոցները` հղում անելով նրա մամուլի քարտուղարին։ Նա մահացել է Ֆրանսիայի հարավում գտնվող իր տանը։ Մինչ այդ նա շրջագայում էր Ճապոնիայում։
Մահվան վերաբերյալ այլ մանրամասներ առայժմ հայտնի չեն։
Նշենք, որ դեռ երեկ նրա ինստագրամյան էջում լուսանկար էր հրապարակվել հանրահայտ դերասան Ժան Պոլ Բելմոնդոյի հետ։
Ազնավուրին սպասում էին Հայաստանում։ Նա պետք է Երևան գար Ֆրանկոֆոնիայի գագաթնաժողովի շրջանակում։
Ազնավուրը՝ գյումրեցիներին. «Ես փոքրամարմին եմ, բայց հսկա արձանը ձեզ եմ թողնում»
Նշանավոր ֆրանսահայ շանսոնյե, երգիչ, երգահան, կինոդերասան և հասարակական գործիչ Շառլ Ազնավուրը (իսկական անունը` Շահնուր Վաղինակ Ազնավուրյան) ծնվել է 1924թ.-ի մայիսի 22-ին Փարիզում՝ հայ գաղթականներ Միքայել և Քնար Ազնավուրյանների ընտանիքում: Մանուկ հասակում տարվել է թատրոնով, իսկ 1940-ական թթ. Պիեռ Ռոշի հետ հանդես է եկել կաբարեում։
Համաշխարհային հռչակ է ձեռք բերել 1956թ.-ին Փարիզի դահլիճներից մեկում հաջող ելույթից հետո։ Նրա գրած երգերը կատարել են Էդիտ Պիաֆը, Լայզա Մինելին, Մստիսլավ Ռոստրոպովիչը, Հուլիո Իգլեսիասը, Շերը, Ջո Դասենը, Ռեյ Չարլզը և այլք։
Շառլ Ազնավուրը միջազգային ասպարեզում ռեկորդային թվով ձայնասկավառակ է վաճառել (180 մլն)։