ԵՐԵՎԱՆ, 1 հոկտեմբերի — Sputnik. Հայաստանի վարչապետ Նիկոլ Փաշինյանը երկուշաբթի ՀՀԿ խմբակցության ղեկավար Վահրամ Բաղդասարյանի հետ կքննարկի խորհրդարանի լուծարման և արտահերթ ընտրություններ անցկացնելու հարցերը։ Այդ մասին խորհրդարանում լրագրողներին ասել է «Ելք» խմբակցության ղեկավար Լենա Նազարյանը։
Հանդիպում անցկացնելու ստույգ ժամանակն առայժմ հայտնի չէ։
Ավելի վաղ վարչապետ Նիկոլ Փաշինյանը, Նյու Յորքից ուղիղ եթեր դուրս գալով, հայտարարել էր, որ Հայաստան վերադառնալուն պես մտադիր է քննարկել քաղաքական ուժերի հետ երկրում ԱԺ արտահերթ ընտրություններ անցկացնելու հարցը։
ՀՀԿ փոխնախագահ, ԱԺ պատգամավոր Գալուստ Սահակյանը սեպտեմբերի 27-ին կուսակցության գործադիր մարմնի նիստից հետո լրագրողներին ասել էր, որ ՀՀԿ-ն պատրաստ է մասնակցել խորհրդարանական արտահերթ ընտրություններին, եթե դրանք կայանան։