ԵՐԵՎԱՆ, 1 հոկտեմբերի — Sputnik. «Քաղաքացիական պայմանագիրը» Սասուն Միքայելյանի որդուն չի աջակցի։ Այս մասին Sputnik Արմենիային հայտնեց «Քաղաքացիական պայմանագիր» կուսակցության մամուլի խոսնակ Վահան Կոստանյանը` մեկնաբանելով Հրազդանի քաղաքապետի արտահերթ ընտրություններում Սևակ Սասունի Միքայելյանի ինքնաառաջադրումը։
««Քաղաքացիական պայմանագրի» անդամն ինքնաառաջադրվել է, բայց կուսակցությունն ունի որոշում, որ չի սատարում և չի աջակցելու այս թեկնածությանը»,- ասաց նա։
Հարցին, թե ինչն է նման որոշման պատճառը, Կոստանյանը պատասխանեց. «Հրազդանի վերաբերյալ կուսակցության ու թեկնածուի տեսլականների տարբերությունը»։
Նա նաև նշեց, որ Միքայելյանի ինքնաառաջադրման շուրջ կուսակցության հետ նախապես պայմանավորվածություն չի եղել։
ԱԺ «Ելք» խմբակցության պատգամավոր, ՔՊ անդամ Սասուն Միքայելյանի 25 տարեկան որդին` Սևակ Միքայելյանը, Հրազդանի քաղաքապետի արտահերթ ընտրություններում առաջադրված 4 թեկնածուներից մեկն է։ Նրա մրցակիցներն են անկուսակցականներ Մանվել Պողոսյանը, Լևոն Ստեփանյանը և Դավիթ Քոչարյանը:
Հրազդանի քաղաքապետի արտահերթ ընտրությունները տեղի կունենան հոկտեմբերի 21-ին:
Հրազդանի նախկին քաղաքապետ, ՀՀԿ անդամ Արամ Դանիելյանը հրաժարական էր ներկայացրել 2018թ-ի հուլիսին։
2016 թվականի ընտրություններում Դանիելյանի հիմնական մրցակիցը Սասուն Միքայելյանն էր, որը Դանիելյանին մեղադրում էր ընտրակաշառք բաժանելու, հրազդանցիների նկատմամբ ճնշումներ գործադրելու մեջ:
Արամ Դանիելյանը Հրազդանը ղեկավարել է 15 տարի: