Աշոտ Սաֆարյա, Sputnik
Ռուսական բիզնեսի դեմ կիրառած ամերիկյան պատժամիջոցները հարված են հասցրել նաև Հայաստանից ԱՄՆ արտահանմանը։ Խոսքը ալյումինե փայլաթիթեղի մասին է, որին բաժին է ընկնում Հայաստանից ԱՄՆ արտահանման ընդհանուր ծավալի մոտ 70%–ը։
Տնտեսագետ Վասիլի Կոլտաշևի կարծիքով` փայլաթիթեղի արտահանման համար այլընտրանքային շուկաներ կարող են դառնալ Չինաստանն ու Հնդկաստանը։
Sputnik Արմենիայի թղթակցի հետ զրույցում նա նշեց, որ վերակողմնորոշումը պետք է ուղղված լինի այս երկու երկրներին։ Այս հարցը լուծելու համար պետական մոտեցում և գրագետ աշխատանք է պետք տանել ալյումինի մատակարարումների դիվերսիֆիկացման ուղղությամբ։
Նրա խոսքով` Չինաստանին, ինչպես և Հնդկաստանին ամերիկյան պատժամիջոցները չեն կանգնեցնի։ Պեկինի համար այդ պատժամիջոցները սկզբունքորեն արդեն կարևոր չեն, նա առանց այդ էլ ԱՄՆ–ի հետ առևտրային պատերազմի մեջ է գտնվում։
«Չինաստանն ընդհանրապես տասնամյակներ շարունակ Հյուսիսային Կորեային պարենամթերք է մատակարարում, ակտիվ առևտուր վարում նրա հետ, և պարզ չէ, թե ինչու այսօր այն պետք է վախենա փայլաթիթեղ գնել։ Հարցն այն է, թե որքանով շահութաբեր կլինեն մատակարարումները։ Կարծում եմ` այստեղ որոշակի ճկունություն է պետք դրսևորել հայկական և ռուսական կողմերի հետ», – ասաց Կոլտաշևը։
Նույն բանը փորձագետը պնդում է Հնդկաստանի դեպքում, որը մասնավորապես, ռուսական սպառազինություն է շարունակում գնել ի հեճուկս ռուսական ՌԱՀ–ն նկատմամբ կիրառած ամերիկյան պատժամիջոցների։ Եթե ավելի լայն համատեքստում դիտարկենք ամերիկյան պատժամիջոցներին հակազդելու հարցը, ապա, Կոլտաշևի կարծիքով, արդյունավետ քաղաքական լուծումներ են անհրաժեշտ։
«Ռուսական ընկերություններին համար խնդիրներ ստեղծել են ԱՄՆ քաղաքական իշխանությունները ։ Հետևաբար, նաև ամերիկյան բիզնեսի դեմ միջոցները պետք է քաղաքական լինեն։ Ամերիկյան բիզնեսը պետք է վճարի դրա համար։ Հարցազրույցներից մեկի ժամանակ ես արդեն ասել էի, որ պետք է դադարել ամերիկյան «Բոինգներ» գնել, որի արտադրության համար էլ ԱՄՆ–ն գնում էր ռուսական ալյումինը։ Դա ամերիկացիների համար զգալի հարված կլինի», – ավելացրեց Կոլտաշևը։
Հիշեցնենք, որ այս տարվա ապրիլին հայկական «Արմենալ–Ռուսալ» գործարանը գրեթե ամբողջությամբ դադարեցրել է ԱՄՆ արտահանումները այն բանից հետո, երբ Վաշինգտոնի պատժամիջոցային ցուցակում հայտնվել է ռուս միլիարդատեր Օլեգ Դերիպասկան` «Ռուսալ» հոլդինգի խոշոր բաժնետերը (որին և պատկանում է «Ռուսալ–Արմենալ» գործարանը)։
Ձեռնարկությունում 370 հազար դրամ միջին աշխատավարձով մոտ 670 մարդ է աշխատում։ Ավելի վաղ հայտնում էին, որ ստիպված հարկադիր պարապուրդի կարող են ուղարկել մոտ 180 մարդու։ 2017 թվականին Հայաստանից ԱՄՆ փայլաթիթեղի արտահանումը կազմում էր մոտ 47.2 մլն դոլար։
Ընդ որում, գործարանի արտադրանքը շարունակում է արտահանվել ԵՄ երկրներ։ Դա փրկում է գործարանը ամբողջությամբ փակվելուց։ Այսպես, 2017 թվականին Գերմանին 29 մլն դոլարի արտադրանք է գնել, Լեհաստանը` 7.2 մլն–ի, Նիդեռլանդները` 5.4 մլն–ի, Իտալիան` 2 մլն–ի, Ֆրանսիան և Ավստրիան` 1.5–ական մլն–ի։