ԵՐԵՎԱՆ, 30 սեպտեմբերի –Sputnik. ՀՀ վարչապետ Նիկոլ Փաշինյանի դեմ ներկայացվող հայցերը սովորական երևույթ են դարձել։ Այս մասին Փաշինյանն ասաց լրագրողներին` մեկնաբանելով ՀՀ երկրորդ նախագահ Ռոբերտ Քոչարյանի կողից նրա դեմ դատարան հայց ներկայացնելը։
Ավելի վաղ հայտնի էր դարձել, որ ՀՀ երկրորդ նախագահ Ռոբերտ Քոչարյանը ՀՀ վարչապետ Նիկոլ Փաշինյանի դեմ դատական հայց է ներկայացրել հանրորեն հնչած զրպարտությունից իր պատիվն ու արժանապատվությունը պաշտպանելու պահանջով։
«Ինձ համար դա սովորական երևույթ է։ Արդեն 25 տարի է Ռոբերտ Քոչարյանն ու Սերժ Սարգսյանն ինձ դատի են տալիս։ Աստված նրանց առողջություն տա ևս 25 տարի, թող շարունակեն», – ասաց Փաշինյանը։
Այն հարցին, թե արդյո՞ք նախկին նախագահները նրա վրա քաղաքական ճնշում են գործադրում, Փաշինյանը ծիծաղով պատասխանեց։
2008 թվականին նախագահական ընտրություններից հետո ՀՀ առաջին նախագահ Լևոն Տեր-Պետրոսյանի համախոհները հրաժարվել էին ընդունել ԿԸՀ-ի տվյալներն ու դուրս էին եկել փողոց։ Ցուցարարների դեմ մարտական զենք էր կիրառվել, 10 մարդ մահացել էր։Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել վկայի կարգավիճակով՝ հարցաքննության։ Նույն օրը Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։