ԵՐԵՎԱՆ, 28 սեպտեմբերի — Sputnik. Դուշանբեում ԱՊՀ գագաթնաժողովին տեղի ունեցավ առանձնազրույց նաև ՌԴ նախագահ Վլադիմիր Պուտինի հետ, և մենք քննարկեցինք հայ-ռուսական հարաբերությունների լայն շրջանակ: Այս մասին ֆեյսբուքի ուղիղ եթերում ասաց ՀՀ վարչապետ Նիկոլ Փաշինյանը:
Նա հիշեցրեց, որ ավելի վաղ հայտարարել էր, որ հայ-ռուսական հարաբերությունները երբեք նման բարձր մակարդակի վրա չեն եղել:
«Հիմա կարող եմ ասել, որ ՌԴ նախագահի հետ մենք ունենք լիարժեք փոխըմբռնում: Դա չի նշանակում, որ մենք բոլոր հարցերի և ամենի վերաբերյալ համաձայն ենք, ոչ ամենևին»,-նշեց նա՝ հավելելով, որ այդ հարաբերություններում անլուծելի խնդիրներ չկան, կա աշխատանքային մթնոլորտ, կա մթնոլորտ՝ միմյանց ներքին գործերին չխառնվելու:
«Այն հարցերը, որոնց շուրջ լիարժեք համաձայնության չենք կարող հասնել այս պահին, քննարկման մթնոլորտում կշարունակվեն մնալ օրակարգում»,-ասաց նա: