ԵՐԵՎԱՆ, 28 սեպտեմբերի — Sputnik. «Փյունիկ» ակումբը հայտարարել է, որ չի անվանափոխվի: Ըստ նրանց տարածած հայտարարության` թիմի երկրպագուների միջև անցկացված քվեարկության արդյունքում որոշվել է թողնել նախկին անվանումը: Բայց ակումբը շուտով նոր տարբերանշան կունենա:
«Ինչպես գիտեք, 2017 թվականի ամռանը փոխվեց «Փյունիկ» ֆուտբոլային ակումբի ղեկավարությունը։ Նոր սեփականատեր Արթուր Սողոմոնյանի առաջնային ծրագրերից մեկն էր կառուցել ուժեղ թիմ՝ նոր փիլիսոփայությամբ և նպատակներով։ Որոշվեց նոր մրցաշրջանից փոխել նաև թիմի անունը: Բոլոր քննարկվող անվանումներից ընտրվեց «Երևանը», քանի որ հետագա հաջողությունները կարող էին լավ գովազդ հանդիսանալ մեր քաղաքի համար, ինչպես նաև «Փյունիկ» ֆուտբոլային ակումբի անցյալի շատ էջեր կցանկանայինք, որ այլևս չհիշատակվեին ու չասոցացվեին թիմի ներկայի հետ»,–գրված է հայտարարության մեջ:
Ինչպես նշված է հայտարարության մեջ, անվանափոխությունը տեղի չի ունեցել, որովհետև իրենց հայտարարությունից հետո շատ արագ կերպով վերաբացվեց «Երևան» ակումբը, դրա համար իրենք չկարողացան նոր մրցաշրջանը սկսել նոր անունով: «Հետո եղան հաջող մրցելույթներ Եվրոպայի լիգայում, որտեղ մեր թիմը ձեռք բերեց բազմաթիվ նոր երկրպագուներ ու վստահ ենք, որ կարողացավ ուրախացնել բազմաթիվ հայ ֆուտբոլասերների:
Եվ կրկին մեր առջև կանգնեց անվանափոխման հարցը: Մենք, իհարկե, հաշվի ենք առնում բոլոր կարծիքները, «այո»-ներն ու «ոչ»-երը: «Փյունիկ» ֆուտբոլային ակումբի մանկապատանեկան դպրոցը տվել է բազմաթիվ ֆուտբոլային աստղեր՝ Հենրիխ Մխիթարյան, Էդգար Մանուչարյան, Ռոբերտ Արզումայան և շատ այլ տաղանդավոր ֆուտբոլիստներ:
Մեր facebook-յան էջում անցկացված հարցման արդյունքում քվեարկողների 64 տոկոսը քվեարկեց «Փյունիկ» անունը պահպանելու, 36 տոկոսը` անվանափոխելու օգտին»,–գրված է հայտարարության մեջ:
Հաշվի առնելով երկրպագուների կարծիքը`ակումբը հայտարարում է, որ «Փյունիկ» ֆուտբոլային ակումբը չի անվանափոխվի ու կպահպանի իր անվանումը:
Ակումբի ղեկավարությունը նաև տեղեկացնում է, որ առաջիկայում կներկայացվի նոր տարբերանշանը, որը կհամապատասխանի «Փյունիկ» անվանը: