ԵՐԵՎԱՆ, 26 սեպտեմբերի — Sputnik. Նիկոլ Փաշինյանը ՄԱԿ-ի ամբիոնն ավելի շատ օգտագործեց Հայաստանում սեփական դիրքերն ընդծելու, քան Հայաստանի անվտանգության և ազգային հարցերը ամրացնելու համար։ Facebook սոցիալական ցանցի իր էջում, վերլուծելով ՀՀ վարչապետի ելույթը, գրել է ԱԺ ՀՀԿ խմբակցության պատգամավոր, ՀՀԿ փոխնախագահ Արմեն Աշոտյանը։
«Հայաստանի նախկին իշխանություններին պիտակավորելուց, ավտորիտար անվանելուց առաջ արժեր հիշել նաև, որ իշխանափոխության խաղաղ ընթացքում միջազգային բոլոր հիմնական դերակատարները մշտապես ընդգծել են նաև մեր խոհեմ, իմաստուն և պետականամետ դերակատարությունը»,- գրել է նա։
Աշոտյանի ձևակերպմամբ`«ԱԺ արտահերթ ընտրությունների մտասևեռումով ռումբ է դրվելու Հայաստանի ներքին կայունության, անվտանգության և հաջորդ բոլոր իշխանությունների սահմանադրականության տակ»։
«Ի վերջո, փողոցներ փակել կարող եք, բերաններ փակել՝ ոչ»,- գրել է Աշոտյանը։
Հիշեցնենք`Նյու Յորքում, ՄԱԿ-ի կենտրոնակայանում, Գլխավոր ասամբլեայի 73-րդ նստաշրջանում հնչեցրած ելույթում վարչապետ Նիկոլ Փաշինյանն անդրադարձել է նաև Հայաստանում տեղի ունեցած թավշյա հեղափոխությանն ու ներքաղաքական ներկա վիճակին:
Փաշինյանը հայտարարել է, որ Երևանի ավագանու ընտրությունների ոգով Հայաստանն այսօր պատրաստվում է արտահերթ խորհրդարանական ընտրությունների: