ԵՐԵՎԱՆ, 26 սեպտեմբերի — Sputnik. ՀՀ ոստիկանության պետի նախկին տեղակալ, ՀՀ ոստիկանության զորքերի հրամանատար Լևոն Երանոսյանը մեղադրվում է 2018թ-ի ապրիլին Բաղրամյանում ցույցի մասնակիցների նկատմամբ լուսաձայնային նռնակներ կիրառելու մեջ։ Այս մասին այսօր տարածած հաղորդագրության մեջ հայտնում է ՀՀ հատուկ քննչական ծառայությունը։
Ըստ առաջադրված մեղադրանքի` Լևոն Երանոսյանը, չունենալով հատուկ միջոցների կիրառման հատուկ որակավորում և «Զարյա» տեսակի լուսաձայնային նռնակներ ստանալու և անձամբ գործադրելու լիազորություն, դրանց կիրառման համար թույլատրելի չափանիշների խախտմամբ, այն է՝ չպահպանելով մարդկանցից առնվազն 2,5 մետր հեռավորությունը, 2018 թվականի ապրիլի 16-ին, ժամը 15-ի սահմաններում, Երևան քաղաքի Բաղրամյան պողոտայում անցկացվող բողոքի զանգվածային ակցիայի ժամանակ գործադրել է 4 հատ «Զարյա» տեսակի լուսաձայնային նռնակ, ինչի հետևանքով ցույցի մասնակիցներից ավելի քան 40 հոգի ստացել են տարբեր աստիճանի, այդ թվում` ծանր և միջին ծանրության մարմնական վնասվածքներ:
ՀՔԾ-ն նաև նշում է, որ վիրավորվածների թվում են եղել նաև ՀՀ ոստիկանության զորքերի զինծառայողներից 6 հոգի: Ի դեպ, նույն այդ նռնակներից առաջին վնասվածքներ ստացողների թվում էր նաև բողոքի ցույցն առաջնորդող Նիկոլ Փաշինյանը։
Բացի այդ, ապրիլի 22-ին, ժամը 14-ի սահմաններում, Երևան քաղաքի Արցախի պողոտայում անցկացվող բողոքի զանգվածային ակցիայի ժամանակ Լևոն Երանոսյանը ցուցարարների նկատմամբ ևս 4 «Զարյա» լուսաձայնային նռնակ է կիրառել, ինչի պատճառով ցույցի մասնակիցներից 6-ն ստացել են մարմնական վնասվածքներ:
Այսպիսով, ՀՔԾ-ում քննվող քրեական գործի շրջանակներում Երանոսյանին մեղադրանք է առաջադրվել ՀՀ քրեական օրենսգրքի 309-րդ հոդվածի 2-րդ և 3-րդ մասերով` այն է` պաշտոնեական լիազորություններն անցնելը, որը զուգորդվել է բռնության, զենքի կամ հատուկ միջոցների գործադրմամբ և անզգուշությամբ առաջացրել են ծանր հետևանքներ
ՀՀ ոստիկանության ներքին զորքերի նախկին հրամանատար Լևոն Երանոսյանի նկատմամբ խափանման միջոց է ընտրվել ստորագրությունը երկրից չհեռանալու մասին:
Երանոսյանի պաշտպան Տիգրան Սաֆարյանը երեկ Sputnik Արմենիային հայտնել էր, որ
Երանոսյանը հրաժարվել է ցուցմունք տալուց և չի ընդունում առաջադրված մեղադրանքը: