ԵՐԵՎԱՆ, 24 սեպտեմբերի — Sputnik. «Հայաստան» համահայկական հիմնադրամի գործադիր տնօրենի պաշտոնն առաջիկա 3 տարիներում կզբաղեցնի ՀՀ վարչապետի խորհրդական Հայկակ Արշամյանը։
Ինչպես հայտնում են հիմնադրամից, նրա թեկնածությունը Հիմնադրամի գործադիր տնօրենի պաշտոնում հաստատել է հիմնադրամի հոգաբարձուների խորհուրդը։
«Հայաստան» համահայկական հիմնադրամից նաև հայտնում են, որ գործադիր տնօրենի թափուր պաշտոնի համար հայտարարված մրցույթին ստացվել էր 42 հայտ` 7 երկրներից (Հայաստան, Ռուսաստան, ԱՄՆ, Մեծ Բրիտանիա, Ֆրանսիա, Շվեյցարիա, Լիբանան):
Ընտրող հանձնաժողովը, որում ընդգրկված են եղել Հայաստանի և Արցախի նախագահների և ՀՀ վարչապետի ներկայացուցիչները, Հիմնադրամի հոգաբարձուների խորհրդի անդամ Ալբերտ Պողոսյանը, Հիմնադրամի գործադիր տնօրենի ժամանակավոր պաշտոնակատար Պետրոս Թերզյանը, քննելով հավակնորդների գործերը, սեպտեմբերի 10-ի նիստում նրանցից 12-ի հետ հարցազրույցի և հետխորհրդակցության արդյունքում հաղթող են ճանաչել Հայկակ Արշամյանին։
47–ամյա, երկու երեխաների հայր, անկուսակցական Հայկակ Արշամյանը ՀՀ վարչապետի խորհրդական էր նշանակվել 2018թ–ի հուլիսի 2-ին։
Նա ավարտել է Երևանի պետական համալսարանի պատմության ֆակուլտետը, պատմական գիտությունների թեկնածու է, կրթությունը շարունակել է Եգիպտոսի արտաքին գործերի նախարարության Միջազգային հետազոտությունների ինստիտուտում և Հարվարդի իրավաբանական դպրոցում։
Արշամյանը դասախոսել է ԵՊՀ–ում, աշխատել կրթության և գիտության նախարարությունում, եղել է արտաքին գործերի նախարարի տեղակալի օգնական։
Աշխատել է տարբեր հայաստանյան ու տարածաշրջանային կազմակերպություններում։
Մինչ այդ, հիմնադրամի տնօրենի համար հայտարարված մրցույթի մասին հիմնադրամի գործադիր տնօրենի խորհրդական Աիդա Խաչիկյանը Sputnik Արմենիային հայտնել էր, որ հայտատուների թվում կան նաև հանրությանը հայտնի անուններ։
Հիշեցնենք`Ազգային անվտանգության ծառայությունը, հուլիսի 2-ին բերման էր ենթարկվել, ապա ձերբակալվել «Հայաստան» համահայկական հիմնադրամի նախկին տնօրեն Արա Վարդանյանին` յուրացումներ կատարելու, հասարակական կազմակերպության ծառայողի լիազորությունները չարաշահելու կասկածանքով։
Վարդանյանը խոստովանել էր, որ տնօրինելով հիմնադրամին տրամադրված 25 միլիոն դրամի վարկային գծով բանկային քարտը, առցանց խաղատներում խաղադրույքներ է կատարել: Ավելի ուշ Արա Վարդանյանը 1 մլն գրավի դիմաց ազատ էր արձակվել, իսկ հուլիսի 10-ին` հրաժարականի դիմում ներկայացրել։