ԵՐԵՎԱՆ, 21 սեպտեմբերի — Sputnik. «Սանիթեք» ընկերության նոր աղբատարները հասել են Հայաստան։ Facebook սոցիալական ցանցում այս մասին գրել է ՀՀ տարածքային զարգացման և կառավարման նախարար Սուրեն Պապիկյանը։
Նա նաև հրապարակել է մեքենաների լուսանկարները։
«Նոր աղբահան մեքենաներն արդեն Երևանում են»,- լուսանկարին կից գրել է նախարարը։
Հիշեցնենք, որ աղբահանությամբ զբաղվող «Սանիթեք» ընկերության տնօրեն Նիկոլաս Էլ Թավիլն ավելի վաղ հայտնել էր, որ Երևանում աղբահանության խնդիրը կլուծվի այն ժամանակ, երբ մայրաքաղաք կհասնեն աղբահավաք հինգ մեքենաները։
5 ավտոմեքենաների տեղ հասնելուց հետո ընկերության պարկում դրանց թիվը հասավ 37-ի։
Թավիլը միաժամանակ նշել էր, որ եթե անգամ 70 բեռնատար էլ բերեն, միևնույն է` տեխնիկան փչանալու է, քանի որ անհրաժեշտ է լուծել «Նուբարաշեն» տանող ճանապարհների խնդիրը։
«Սանիթեքի» տնօրենն ասել էր նաև, որ սովորական իրավիճակում քաղաքը մաքրելու համար 27 մեքենա պետք աշխատեն, սակայն ավելի շատ մեքենա է հարկավոր, որպեսզի տեխնիկական խնդիրների դեպքում մեքենաները փոխարինվեն։
Ավելի վաղ նախարար Սուրեն Պապիկյանը հայտնել էր, որ Երևանում աղբահանության իրավունքը կարող են մասամբ կամ լիովին վերցնել «Սանիթեք» ընկերությունից։
Հուլիս-օգոստոս ամիսներին աղբահանությունը Երևանում պատշաճ ձևով չէր իրականացվում։ Իրավիճակը սրում էր անոմալ շոգը, որի հետևանքով աղբի կուտակման վայրերում սաստիկ գարշահոտություն էր տարածվում, վտանգավոր վարակների օջախներ էին ի հայտ եկել։ Հուլիսի վերջին ընկերությունը տուգանվեց 12 միլիոն դրամով ու հայտարարեց, որ հաշվի կառնի քաղաքապետարանի դիտողությունները։