ԵՐԵՎԱՆ, 19 սեպտեմբերի — Sputnik. Վրացի միլիարդատեր և Վրաստանի նախկին վարչապետ Բիձինա Իվանիշվիլու որդին` ռեփեր Բերան, ամուսնության առաջարկություն է արել նորաձևության ոլորտի բլոգեր Նանուկա Գուդավաձեին։ Այդ մասին Բերան գրել է Facebook-ի իր էջում։
«Եվ այն, ինչ մինչև հիմա եղել է իմը և քոնը, այսօր դարձել է մերը, — լուսանկարին կից գրել է Իվանիշվիլին և ավելացրել,- նա ասաց` այո»։
Ինչպես հայտնում են վրացական ԶԼՄ-ները, զույգին ծանոթացրել են ծնողները. Բերայի և Նանուկայի ծնողները հին ընկերներ են։
ԶԼՄ-ները ենթադրում են, որ նրանք պաշտոնապես կամուսնանան Բերայի ծննդյան օրը` դեկտեմբերի 23-ին։
Նանուկան նախկինում մոդել է եղել, այժմ նորաձևության աշխարհում հայտնի բլոգեր է։
Բերայի տեսահոլովակները միլիոնավոր դիտումներ են հավաքում։ Նրա առաջին սինգլը` Favorite Things, թողարկվել է 2011թ-ին։ Բերան 23 տարեկան է։