ԵՐԵՎԱՆ, 18 սեպտեմբերի — Sputnik. ՀՀ կառավարությունը քննարկում է Հարկային օրենսգրքի փոփոխությունների հարցը և շատ լավ որոշման է հանգում անհատ տաքսիների վարորդների համար: Այս մասին Ֆեյսբուքի ուղիղ եթերում հայտնեց ՀՀ վարչապետ Նիկոլ Փաշինյանը:
«Անհատ տաքսի վարորդները կազատվեն հարկային որևէ պարտավորությունից և նրանք հնարավորություն կունենան իրենց գործունեությունը իրականացնել ավելի ազատ պայմաններում»,-նշեց Փաշինյանը:
Ըստ Փաշինյանի` դա կարող է նպաստել տաքսիների սակագների նվազմանը:
«Մանավանդ երեկոյան և առավոտյան ժամերին, երբ կանգառներում մարդիկ են հավաքված, տաքսիների վարորդները հնարավորություն կունենան այդ ուղևորներին տեղափոխել մատչելի գներով»,- նկատեց Փաշինյանը:
Վարչապետը տեղեկացրեց, որ կառավարությունը շատ մոտ է այդ որոշմանը, և Հայաստանի տարածքում անհատ տաքսիստները կազատվեն բոլոր տեսակի հարկերից:
Այնուհանդերձ Փաշինյանը նաև կարևորեց ուղևորների և երթևեկության անվտանգությունը և հավելեց, որ դա կկարգավորվի տաքսիների տեխնիկական սպասարկման միջոցով:
Այս համատեքստում նա անդրադարձավ այն խնդրին, որ Հայաստանում տեխսպասարկում, ընդհանուր առմամբ, տեղի չի ունենում և ձևական բնույթ է կրում: Նա խոստացավ, որ կառավարությունն ամեն ինչ կանի, որ մեքենաների տեխսպասարկումը ունենա շատ հստակ անվտանգության խթանման արդյունք: