ԵՐԵՎԱՆ, 17 սեպտեմբերի — Sputnik. Լեռնային Ղարաբաղի հիմնախնդրի կարգավորումը վերաբերում է առաջին հերթին Լեռնային Ղարաբաղին: Այսօր արցախյան լրատվամիջոցների ներկայացուցիչների հետ ճեպազրույցի ժամանակ ասել է ՀՀ արտգործնախարար Զոհրաբ Մնացականյանը։
«Վերջնական որոշումն ու որոշիչ ձայնն այս հարցում պատկանում է Արցախին: Եվ առանց խորհրդակցելու, առանց միասին աշխատելու մենք չենք կարող որևէ լուրջ առաջընթաց գրանցել»,- ասել է նա` նշելով, որ դա է իր արցախյան այցի առաջնային նպատակը:
Նա խոսել է նաև արցախցիների մասին։
«Բոլորիս համար Լեռնային Ղարաբաղը հակամարտություն չէ, Լեռնային Ղարաբաղը մարդիկ են։ Արցախցիները, մարդիկ, կոնկրետ՝ 150 հազար, իրենց անուններով, առօրյայով, իրենց ընտանիքներով, իրենք հոգսերով, իրենց հույսերով, իրենց նպատակներով, ինչպես յուրաքանչյուր ժողովուրդ, կերտում են իրենց ապագան, իրենց կյանքը»,- ասել է Մնացականյանը:
Պատասխանելով Ադրբեջանի արտգործնախարարի հետ հնարավոր հանդիպման մասին լրագրողի հարցին, նախարարը պատասխանել է. «Այո՛, սա շարունակական գործընթաց է, այն լինելու է: Դրա մասին համաձայնեցված կերպով կհայտարարվի»:
Մնացականյանն ավելի վաղ հայտնել էր, որ շատ շուտով կկայանա ադրբեջանցի գործընկեր Էլմար Մամեդյարովի հետ հանդիպումը։