ԵՐԵՎԱՆ, 15 սեպտեմբերի —Sputnik. Թուրքիայի նախագահ Ռեջեփ Թայիփ Էրդողանն այցելել է թուրքական զորքերի կողմից Բաքվի ազատագրման 100-ամյակին նվիրված շքերթին ու առիթը բաց չի թողել խոսելու հայ-թուրքական սահմանի բացման պայմանների մասին։ Այս մասին հայտնում են ադրբեջանական լրատվամիջոցները։
Նախագահը նշել է, որ քանի արցախյան հակամարտությունը չի լուծվել, սահմանը փակ է մնալու։
«Ադրբեջանի ուրախությունը Թուրքիայի ուրախությունն է։ Ադրբեջանի ցավը Թուրքիայի ցավն է», — ասել է Էրդողանը` նշելով, որ Անկարան անում է ամեն հնարավոր բան բարեկամ երկրի խնդիրները վերացնելու համար։
Նա վստահեցրել է, որ Թուրքիան ցուցաբերում ու շարունակելու է ցուցաբերել հնարավոր օգնություն Ադրբեջանին։
Հիշեցնենք` 2009թ. հոկտեմբերի 10-ին Ցյուրիխում Հայաստանի և Թուրքիայի միջև կնքվել էին երկու երկրների հարաբերությունների կարգավորումը նախատեսող արձանագրություններ, որոնք այնուհետև պետք է վավերացվեին երկու երկրների խորհրդարանների կողմից: Թուրքական կողմը կարճ ժամանակ անց արձանագրությունների վավերացման համար առաջ էր քաշել Լեռնային Ղարաբաղի հակամարտության կարգավորման վերաբերյալ նախապայմաններ:
ՄԱԿ-ի Գլխավոր ասամբլեայի 72-րդ նստաշրջանին նախագահ Սերժ Սարգսյանն ասաց, որ 2018 թվականի գարունը Երևանը կդիմավորի առանց թուրքական արձանագրությունների։