ԵՐԵՎԱՆ, 14 սեպտեմբերի — Sputnik. ԱԱԾ-ն և ոստիկանությունը չեն ուշացրել վարչապետ Նիկոլ Փաշինյանի հանձնարարականի կատարումը։ Այսօր կառավարության նիստից հետո լրագրողներին ասաց ՀՀ ոստիկանապետ Վալերի Օսիպյանը։
«Ցանկացած հանձնարարական կատարվում է անմիջապես, սահմանված ժամկետում և զեկուցվում վարչապետին»,- ասաց նա։
Խոսքը վերաբերում է սեպտեմբերի 11-ին Դավթաշենում հրավիրված նախընտրական հանրահավաքում վարչապետ Նիկոլ Փաշինյանի` ԱԱԾ-ին և ոստիկանությանը տրված հանձնարարականին։ Վարչապետը հրահանգել էր «ռեյդ անել, օլիգարխներին, բարձրաստիճան պաշտոնյաներին, թիկնազորներին պառկեցնել ասֆալտին և զինաթափել» և 2 ժամվա ընթացքում զեկուցել իրեն։
Օսիպյանը վստահեցրեց, որ երկու ժամվա ընթացքում վարչապետին զեկուցվել է, բայց թե ինչ, հրապարակման ենթակա չէ։
Ինչ վերաբերում է օլիգարխների թիկնապահների զինաթափման գործողություններին, Օսիպյանը նշեց, որ դա մշտական գործընթաց է։
«Ոստիկանությունը ոչ թե հաճույք է ստանում որևէ քաղաքացու ասֆալտին պառկեցնելուց կամ պատին ու մեքենային դեմ տալուց, քաղաքացուն ստուգելուց, այլ դա օրինական գործընթաց է` պայմանավորված նրանով, որ տվյալ անձանց մոտ լինում են զենքեր։ Մենք ունենք տեղեկություն, որ իրենք զենք ունեն, իսկ զինված քաղաքացին համարվում է վտանգ ոստիկանի համար։ Այդ տեղեկությունը մենք ստուգում ենք, երբ տեսնում ենք, որ զենքն օրինական է, փոխանցում ենք փորձաքրեագիտական բաժնին` ճշտելու դրա առնչությունը որևէ հանցագործության»,- ասաց նա։
Ոստիկանապետը նաև հայտնեց, որ օլիգարխների ու նրանց թիկնազորի մասին բողոքներ ոստիկանությունը ստանում է նաև քաղաքացիներից այն մասին, որ նրանք խանգարում են երթևեկությանը։
«Մենք երբևիցե որևէ խնդիր չենք առաջացրել դիմացից երթևեկող ավտոմեքենայի համար` անկախ դրա մեջ գնվող անձի կարգավիճակից, նրա օլիգարխ լինելուց։ Ամբողջ խնդիրը հետևից երթևեկող` ուղեկցող մեքենայի մեջ է։ Մենք բոլորս գիտակցում ենք, որ երկրորդ մեքենայում սովորաբար լինում են թիկնապահներ, թիկնազորեր, որոնք կարող են զինված լինել»,- ասաց նա։
Ոստիկանապետը վստահեցրեց, որ այդ գործողությունները ոստիկանությունն իրականացնում է ոչ միայն վարչապետի հանձնարարականից հետո, այլև դրանից առաջ։ Իսկ թե այդ ընթացքում քանի օլիգարխի ավտոշարասյուն է վնասազերծվել և որքան զենք-զինամթերք է առգրավվել, Օսիպյանը չպատասխանեց` հորդորելով այդ հարցերն ուղղել ոստիկանության լրատվական ծառայությանը։
Ինչ վերաբերում է համացանցում տարածված տեսանյութերին, Օսիպյանն ասաց, որ ոստիկանությունը որևէ տեսանյութ չի նկարահանել, չի տարածել, դրանք նկարահանել են անցորդներն ու հրապարակել համացանցում։
Անդրադառնալով օլիգարխների մոտ գաղտնալսման սարքերի հնարավոր առկայության մասին հայտարարություններին` Ոստիկանության պետը չասաց վերջին օրերին կատարված հատուկ գործողությունների արդյունքում նման սարքեր հայտնաբերվել են, թե ոչ, բայց հիշեցրեց, որ հարուցված է քրեական գործ, և այդ ուղղությամբ աշխատանքներ են տարվում։
Հիշեցնենք`սեպտեմբերի 11-ին համացանցում տարածվել էր Հայաստանի Ազգային անվտանգության ծառայության տնօրեն Արթուր Վանեցյանի և Հատուկ քննչական ծառայության պետ Սասուն Խաչատրյանի հեռախոսազրույցի ձայնագրությունը։ 8-րոպեանոց հեռախոսազրույցի ընթացքում նրանք քննարկում են Հայաստանի նախկին նախագահ Ռոբերտ Քոչարյանի կալանքը, ինչպես նաև ՀԱՊԿ գլխավոր քարտուղար Յուրի Խաչատուրովի և ՊՆ նախկին ղեկավար Միքայել Հարությունյանի դեմ հարուցված քրեական գործերը։
Նախկին 3 պաշտոնյաները մեղադրվում են 2008թ-ի մարտի դեպքերի ժամանակ սահմանադրական կարգը տապալելու մեջ, որը հանգեցրել է 10 մարդու մահվան։