ԵՐԵՎԱՆ, 13 սեպտեմբերի — Sputnik. Մենք ունեցել ենք դինամիկ առաջընթաց ժողովրդավարության առումով և իրավունք չունենք հետադարձ քայլեր անելու: Այսօր ԱԺ-ում, լրագրողների հետ զրույցում ասաց ԱԺ նախագահ Արա Բաբլոյանը` հիշեցնելով, որ ինքը Հայաստանում իշխանափոխությունից հետո հանդիպումներ է ունեցել և իր մտահոգություններ այս հարցի շուրջ հայտնել է ՀՀ նախագահին, վարչապետին, ՄԻՊ-ին:
Անդրադառնալով ՀՔԾ և ԱԱԾ ղեկավարների հեռախոսազրույցի գաղտնալսմանն ու նրանց ասուլիսին հետևած Նիկոլ Փաշինյանի հրապարակային ելույթին` Երևանի ավագանու քարոզարշավի շրջանակներում տեղի ունեցած հանրահավաքի ժամանակ` Արա Բաբլոյանն ասաց. «Ես երեկ համաձայնեցի, որ ժամանակը երկարացնեմ, թույլ տամ, որ վարչապետը ելույթն ավարտի, որպեսզի դա տեղի ունենա ոչ թե միտինգի ժամանակ, այլ վարչապետի ելույթն ավարտվի ԱԺ-ում»:
Նման հարցերը, Բաբլոյանի համոզմամբ պետք է լուծվեն խորհրդարանում: Ինչ վերաբերում է Հայաստանին սպառնացող բռնապետության վտանգի մասին խոսակցություններին, Բաբլոյանը նշեց.« Մենք բոլորս պետք է գնանք նրան, որ նման բաներ մեր երկրում տեղի չունենան»:
Հիշեցնենք, որ երեկ ՀՀ 2–րդ նախագահ Ռոբերտ Քոչարյանը ասել էր, որ «շնորհավորում է Հայաստանի ժողովրդին նոր բռնապետ ունենալու համար»։