ԵՐԵՎԱՆ, 11 սեպտեմբերի — Sputnik. Համապետական նշանակության «Շանթ-2018» զորավարժության շրջանակում զորավարժության սցենարով նախատեսված պայմանականորեն փոխվել է տարածաշրջանի աշխարհաքաղաքական իրավիճակը, սահմանին դրությունը սրվել է, կան կորուստներ:
Ինչպես տեղեկացնում են ՀՀ ՊՆ մամուլի ծառայությունից, նախարարություններն այժմ գործում են արտակարգ ռեժիմով, քանի որ պայմանականորեն համարվում է, որ կան նաև տեխնածին ու բնական աղետներ, ինչպես նաև փախստականների ներհոսքի վտանգ:
Առկա է պայմանական սպառնալիք, որ փախստականների հետ Հայաստան կարող են ներթափանցել նաև ահաբեկիչներ:
Արտակարգ ռեժիմով իր գործառույթներն է իրականացնում նաև ՀՀ արտաքին գործերի նախարարությունը: Պայմանականորեն ՀՀ ԱԳՆ են կանչվել դեսպանները, որպեսզի տեղեկացվեն առկա իրավիճակի ու Հայաստանի դիրքորոշման մասին:
Հիշեցնենք, որ «Շանթ 2018» լայնածավալ հրամանատարաշտաբային զորավարժությունները Հայաստանում անցկացվում են սեպտեմբերի 11-13-ը։Զորավարժություններն ուղղված են ինչպես պաշտպանության նախարարության, այնպես էլ պետական կառույցների և տեղական ինքնակառավարման մարմինների պատրաստվածության մակարդակի ստուգմանը։ Խոսքը վերաբերում է ոչ միայն Հայաստանի նկատմամբ ռազմական ագրեսիայի վտանգին, այլև թե որքան են պատրաստ բնածին և տեխնածին աղետներին։