ԵՐԵՎԱՆ, 10 սեպտեմբերի — Sputnik. ՀՀ վարչապետ Նիկոլ Փաշինյանի անձնական կարգադրությամբ` ռուս մասնագետները հանրապետությունում գործող ամերիկյան լաբորատորիաների հասանելիություն են ստացել։ Այս մասին նա ասել է «Կոմերսանտ» պարբերականի հետ զրույցում։
Հիշեցնենք, որ Հայաստանում մի քանի արտասահմանյան կենսաբանական լաբորատորիա է գործում, որոնց հարցում որոշակի լարվածություն է դրսևորում Ռուսաստանը, քանի որ այդ լաբորատորիաները ֆինանսավորվում են Պենտագոնից։ 2017 թվականի հոկտեմբերի վերջին ՌԴ ԱԳՆ փոխնախարար Սերգեյ Ռյաբկովը նշել էր, որ համաճարակի բռնկումը կարող է արհեստականորեն հրահրվել` ակնարկելով արտասահմանյան լաբորատորիաների գործունեությունը հետխորհրդային տարածքի երկրներում։
Փաշինյանի խոսքով` ռուս մասնագետները 10-15 օր առաջ կարողացել են ուսումնասիրել Ռուսաստանին մտահոգող լաբորատորիաների գործունեությունը։
«Նրանք հասանելիության հետ կապված երբեք խնդիր չեն ունեցել և չեն ունենա այն պահից, երբ ես դարձա ՀՀ վարչապետ», — ընդգծել է Փաշինյանը։
Վարչապետը նշել է, որ լաբորատորիաները ՀՀ իշխանությունների լիարժեք վերահսկողության տակ են։
«Մենք պատրաստ ենք համագործակցել, ռուս մասնագետներն արդեն եղել են այնտեղ և համոզվել, որ այդ լաբորատորիաներում որևէ վախենալու բան չկա», — ասել է վարչապետը։
Միևնույն ժամանակ Փաշինյանը նշել է, որ լաբորատորիաները լավն են, բայց դրանք որևէ դեպքում չեն կարող Ռուսաստանի դեմ օգտագործվել։