ԵՐԵՎԱՆ, 8 սեպտեմբերի — Sputnik. Հայաստանի վարչապետ Նիկոլ Փաշինյանը հույս է հայտնել, որ Հայաստանի և Ռուսաստանի հարաբերությունները հետագայում ևս կկառուցվեն երկրների շահերը հարգելու և ներքին գործերին չմիջամտելու սկզբունքի վրա: ՌԻԱ Նովոստիի փոխանցմամբ` այս մասին նա ասել է ՌԴ նախագահ Վլադիմիր Պուտինի հետ հանդիպման ժամանակ։
«Վստահ եմ, որ այդ հարցերը (երկու երկրների) կլուծվեն, և մենք կհիմնվենք մեր դաշնակցային հարաբերությունների շահերը հարգելու, մեր երկրների շահերը հարգելու, միմյանց ներքին գործերին չմիջամտելու սկզբունքով մեր երկրների ինքնավարությունը հարգելու վրա», — ասել է Փաշինյանը Պուտինին։
Նա ավելացրել է, որ պետք է փորձել բացահայտել երկու երկրների հարաբերությունների ամբողջ ներուժը: Փաշինյանի խոսքով` ի հեճուկս երկու երկրների ԶԼՄ-ներում առկա հոռետեսական հրապարակումների, փոխգործակցությունը «դինամիկ» կերպով զարգանում է:
Նիկոլ Փաշինյանը Մոսկվա է մեկնել այսօր։ Նա անմիջապես ուղևորվել է Կրեմլ, որտեղ հանդիպել է ՌԴ նախագահ Վլադիմիր Պուտինի հետ։ 17։00-19։00-ն հանդիպում է նախատեսված Ռուսաստանում բնակվող հայ գործարարների հետ։
Փաշինյանը Մոսկվայից Երևան կվերադառնա այսօր երեկոյան։
ՀՀ վարչապետի այս այցը երրորդն է։ ՌԴ նախագահ Վլադիմիր Պուտինն ու ՀՀ կառավարության ղեկավար Նիկոլ Փաշինյանը բանակցություններ են ունեցել Սոչիում մայիսի 14-ին ԵԱՏՄ երկրների ղեկավարների համար նախատեսված գագաթնաժողովի շրջանակում։ Հաջորդ հանդիպումը տեղի է ունեցել Մոսկվայում հունիսի 13-ին, այն ժամանակ Նիկոլ Փաշինյանն այցելել էր Ֆուտբոլի աշխարհի առաջնության բացման արարողությանը։