ԵՐԵՎԱՆ, 8 սեպտեմբերի — Sputnik. Մոտ մեկ ամիս առաջ մի խումբ դիմակավորված անձինք իբր օպերատիվ տեղեկությունների հիման վրա ներխուժեցին ինձ և ազգականներիս պատկանող բնակարաններ և շինություններ: Facebook սոցիալական ցանցում գրել է ՀՀ ազգային ժողովի նախկին նախագահ Հովիկ Աբրահամյանը։
«Ո՛չ իմ փաստացի բնակության, և ո՛չ էլ հաշվառման վայրերում իրականացված խուզարկության արդյունքում որևէ անօրինական առարկա չհայտնաբերվեց, սակայն չնայած դրան իրավապահներն առգրավեցին իմ անձնագիրը՝ կոպտորեն խախտելով ՀՀ օրենսդրությունը»,- գրել է նա:
Աբրահամյանը նշել է նաև, որ խուզարկություն կատարվեց Մխչյանի մեխանիկական գործարանի տարածքում։
«Նախ հրապարակայնորեն փորձ արվեց տարածքը կապել իմ անվան հետ, իսկ այդուհետ՝ այդ տարածքում հայտնաբերված զենքերը կապել Մարտի 1-ի հետ: Ակնհայտ է, որ փաստերի նման շղթայական խեղաթյուրման թիրախը ես էի: Թերևս դա է պատճառը, որ առ այսօր հրապարակված չեն փորձաքննության արդյունքները»,- ընդգծել է Աբրահամյանը:
ԱԺ նախկին խոսնակը հիշեցրել է, որ 2018թ.-ի սեպտեմբերի 4-ին կայքերից մեկին տված հարցազրույցում քննադատել է ՀՀ իշխանությունների այդ գործելաոճը:
«Ի պատասխան դրա, հարցազրույցից ընդամենը մեկ օր անց ծանուցում ստացա՝ մեկ այլ քրեական գործով որպես վկա ՀՀ հատուկ քննչական ծառայություն հրավիրվելու մասին: ՀՔԾ-ում ինչ-որ շինծու քրեական գործով ինձ նախ հարցաքննեցին որպես վկա, ապա դրանից անմիջապես հետո անհիմն մեղադրանք առաջադրեցին և ստորագրություն վերցրեցին՝ երկրից չհեռանալու մասին: Զավեշտալի է, երբ ոչ ականջահաճո հարցազրույցից հետո մարդուն հրավիրում են ՀՔԾ, ակնհայտ կեղծ մեղադրանք առաջադրում՝ նպատակ ունենալով լռեցնել ցանկացած այլակարծություն»,- գրել է նա:
Աբրահամյանն այս պահին նպատակահարմար չի համարել ավելին ասել։
«Առայժմ արձանագրեմ, որ ՀՀ իշխանությունների կողմից իրականացվող «մարդաորսը», ազատ խոսքի ու այլակարծության ճնշմանն ուղղված գործողությունները լավ հանգրվան չեն ունենալու»,- եզրափակել է նա:
Հիշեցնենք` ՀՀ քննչական կոմիտեն օգոստոսի 29-ին հաղորդագրություն էր տարածել` նշելով, որ Հովիկ և Ջոնիկ Աբրահամյանների ու Ալիկ Սարգսյանի անունները հայտնվել են նոր քրեական գործում։ «Ավազահատիկ» ՍՊ ընկերության տնօրենը հաղորդում է ներկայացրել` հայտնելով, որ Հովիկ և Ջոնիկ Աբրահամյաններն ու Ալիկ Սարգսյանը շուրջ 10 տարի առաջ փորձել են տիրանալ իր բիզնեսին։