Ո՞վ պատասխան կտա զորամասում հայտնաբերված անորակ վարտիքների համար

Ռազմական ոստիկանությունում հարուցվել է քրեական գործ, որովհետև հայտնաբերված վարտիքները հարիր չեն զինծառայողներին։
Sputnik

ԵՐԵՎԱՆ, 4 սեպտեմբերի — Sputnik. ՀՀ ՊՆ զինծառայողների սոցիալական պաշտպանության վարչության և ՊՆ ՌՈ աշխատանքային պլանի համաձայն` զորքերում իրականացվող աշխատանքների շրջանակում N զորամասում հայտնաբերվել էին զինվորական վարտիքներ, որոնք բացարձակապես չէին համապատասխանում ՊՆ կարիքների համար ձեռք բերվող նմանատիպ ապրանքների տեխնիկական բնութագրերին և որոնց կրումը հարիր չէր զինծառայողներին: Այս մասին հայտնում է ՀՀ պաշտպանության նախարարության մամուլի ծառայությունը։

Ստուգումների արդյունքում հայտնաբերվել էր 10000 անորակ վարտիք։

ՀՀ Ռազմական ոստիկանության աշխատակիցների հետաքննության արդյունքում ՀՀ քրեական օրենսգրքի 376-րդ հոդվածի 2-րդ մասով (Ծառայության նկատմամբ պետի կամ պաշտոնատար անձի անփույթ վերաբերմունքը, որն անզգուշությամբ առաջացրել է ծանր հետևանքներ) հարուցվել է քրեական գործ։ Կատարվում է նախաքննություն։

Նշենք, որ Քրեական օրենսգրքի տվյալ հոդվածը երեքից վեց տարվա ազատազրկում է նախատեսում։