ԵՐԵՎԱՆ, 3 սեպտեմբերի — Sputnik. Հունաստանի իրավապահ մարմինները սկսել են հետաքննել Instagram-ի ավստրալիացի բլոգեր և մոդել Շինեյդ Մակնամարային մահը։ Մոդելին գտել էին Կեֆալոնիայում մեքսիկացի միլիարդատիրոջը պատկանող Mayan Queen IV զբոսանավի վրա։ Այս մասին հայտնում է ՌԻԱ Նովոստին` հղում անելով Kathimerini հունական թերթին։
Times թերթն իր հերթին գրում է, 20-ամյա մոդելին գտել են զբոսանավի վրա ծայրահեղ ծանր վիճակում, ավելի ուշ նա կոմայի մեջ է ընկել և մահացել է Աթենքի հիվանդանոց ուղղաթիռով տեղափոխման ժամանակ։
Թերթի համաձայն` աղջիկն աշխատում էր զբոսանավի վրա Եվրոպայով 4 ամսվա ծովագնացության ժամանակ, սակայն Մակնամարայի պաշտոնն ու նրա պարտականությունները չեն նշում։ Իր ճանապարհորդությունների լուսանկարները աղջիկը հրապարակում էր Instagram–ում, որտեղ նա մոտ 23.2 հազար բաժանորդ ուներ։ Իրավապահ մարմինների աղբյուրը պարբերականին հայտնել է, որ ոստիկանությունը դիտարկում է ինքնասպանության վարկածը։
Ավստրալիական News.com.au լրատվական պորտալը հայտնում է, որ միջադեպի ժամանակ նավի վրա միայն անձնակազմի անդամներն էին, որոնք էլ հենց հայտնաբերել են անգիտակից վիճակում գտնվող աղջկան։ Մոդլեի բարեկամը ավստրալիական լրատվամիջոցներին հայտնել է, որ ընտանիքը կարծում է, որ Մակնամարան մահացել է դժբախտ պատահարի հետևանքով։
ԶԼՄ–ները հայտնում են, որ զբոսանավը պատկանում է 87-ամյա միլիարդատեր Ալբերտո Բայլերեսին, որի կարողությունը 2018 թվականին Forbes ամսագիրը 9.6 մլրդ դոլար էր գնահատել։ Բայլերեսը Մեքսիկայի ամենահարուստ մարդկանցից մեկն է և գլխավորում է Industrias Penole հանքարդյունաբերող ընկերությունը։ ԶԼՄ–ների հոդվածների համաձայն` միլիարդատերն իր ընտանիքի հետ միասին լքել էր նավը միջադեպից մի քանի օր առաջ։