Արմենուհի Մխոյան, Sputnik.
Գյումրու երիտասարդները հավաքվեցին ու որոշեցին՝ Գերմանիայում Բեռլինի պատ կա, Իսրայելում՝ Լացի, Չինաստանում՝ Չինական, Դանիայում՝ Ուրախ, իսկ Հայաստանում պիտի Անեկդոտի պատ լինի: Իսկ Անեկդոտի պատը որտե՞ղ պետք է լիներ, եթե ոչ հումորի մայրաքաղաքում:
Գյումրու հենց կենտրոնում՝ Վարդանանց հրապարակի անմիջական հարևանությամբ՝ Շահումյան 188 շենքի պատն ամբողջությամբ այսուհետ անեկդոտ կպատմի, ավելին՝ քաղաք այցելած հյուրերը դժգոհ չեն մնա. Գյումրվա համով-հոտով անեկդոտները նաև ռուսերեն ու անգլերեն են: Չնայած նախաձեռնության անդամները վստահեցնում են՝ Գյումրվա հումորի հաջողությունը սուր մտքի ու բարբառի մեջ է:
Պատն ավելի խոսուն է քաղաքին հատուկ կոլորիտային պատկերների շնորհիվ:
«Տեսքն ու դիզայնը հետագայում ուզում ենք փոխել։ Անեկդոտների թիվն էլ կշատանա։ Հիմա փորձել ենք հանրության համար կարեւոր կենցաղային բնույթի կատակներ փոխանցել մարդկանց։ Սա բոլորի կողմից ընդունելի թեմա է և հաճելի է ընթերցել»,- Sputnik Արմենիային ասաց «Գյումրին մեր տունն է» երիտասարդական նախաձեռնության համահիմնադիր Արսեն Վարդանյանը:
Գյումրեցի երիտասարդները «ՕՍՄ» հիմնադրամի հայտարարված մրցույթին էին ներկայացրել «Գյումրին մեր տունն է» երիտասարդական նախաձեռնության «Անեկդոտների պատ» նախագիծը, որն էլ հաղթող ճանաչվեց: Նախաձեռնությունը կյանքի կոչելու համար շատ կազմակերպություններ ու մարդիկ աջակցեցին:
Գյումրին հումորի մայրաքաղաք է, սա անհերքելի փաստ է: Դեռ 5 տարի առաջ Facebook սոցիալական ցանցում բացված «Կատակում են գյումրեցիները» խումբն այսօր արդեն մոտ 167 հազար անդամ ունի, սա էլ նախաձեռնող խմբին ստիպել է մտածել քաղաքում ոչ միայն անեկդոտները բերանացի լսելու, այլ նաև կարդալու հնարավորություն ընձեռելու մասին:
«Սա ոչ միայն զբոսաշրջությունը զարգացնելու յուրօրինակ դրսևորում է, այլ նաև տրամադրություն փոխանցող քայլ»,- ասում է Արսենը, հետո էլ ավելացնում՝ տուն-տեղ ծախեք, համեցեք Գյումրի:
Անեկդոտների պատից անեկդոտներ չենք մեջբերում։ Համեցեք Գյումրի ու ինքներդ կարդացեք: