ԵՐԵՎԱՆ, 1 սեպտեմբերի — Sputnik, Խաչիկ Չախոյան. Սեպտեմբերի 6-ին Հայաստանի ազգային հավաքականը մեկնարկում է Ազգերի լիգայի խաղարկությունում: Այդ օրը մեր հավաքականը կանցկացնի ոչ միայն առաջին հանդիպումն այս մրցաշարում, այլ միաժամանակ առաջին անգամ կմրցի Լիխտենշտեյնի ընտրանու հետ:
Հիմա շատերը չեն էլ կասկածում, որ Հայաստանի հավաքականը հաղթելու է այդ խաղում: Իրականում մեր հավաքականն իր արդյունքներով, վարկանիշով և ցուցադրած խաղով գերազանցում է մրցակցին և արդարացի կերպով համարվում է ֆավորիտն այս մրցակցությունում: Բայց, բնականաբար, այս գործոնները դեռևս հաղթանակ չեն նշանակում: Մեր թիմին սպասում է լարված խաղ:
36 հազար բնակչություն ունեցող երկրում` Լիխտենշտեյնում, ֆուտբոլն ամենասիրված մարզաձևն է: Ըստ որոշ տվյալների` Լիխտենշտեյնում ֆուտբոլով (պրոֆեսիոնալ և սիրողական) զբաղվում են մոտ 2000 մարդ: Սա արդեն իսկ նշանակում է, որ մրցակիցն ուժեղներից չէ: Բայց թերագնահատել Լիխտենշտեյնի կարգի թիմերին երբեք չի կարելի: Գաճաճ պետությունների հավաքականները միշտ էլ պատրաստ են անակնկալ մատուցել, ու այս թիմն իր պատմության մեջ ոչ շատ, բայց շատ լուրջ անակնկալներ ունի մատուցած: Վերջին ամենախոշոր անակնկալը գրանցվել է 2007 թվականին, երբ Լիխտենշտեյնը 3:0 հաշվով առավելության է հասել Իսլանդիայի ընտրանու նկատմամբ:
Իսկ վերջին հաղթանակը պաշտոնական խաղերում գրանցվել է 2014 թվականին, երբ մրցակցի հարկի տակ Լիխտենշտեյնը 1:0 հաշվով հաղթել է Մոլդովային: 2018 թվականի աշխարհի առաջնության ընտրական փուլում Լիխտենշտեյնի հավաքականը անցկացրած տասը խաղերում կրել է նույնքան պարտություն:
Թվերը, փաստերը, ֆուտբոլիստների վարպետությունն ու փորձը Հայաստան-Լիխտենշտեյն մրցավեճում խոսում են մեր առավելության մասին: Սակայն հաղթանակը կերտվում է խաղադաշտում ու մեր ֆուտբոլիստներից հերթական անգամ պահանջվելու է մաքսիմում ջանքեր` այդ հաղթանակին հասնելու համար: Իհարկե, կախված խաղի ընթացքից, հանդիպումը տարբեր ճանապարհով կարող է շարունակվել:
Այդ առումով մերոնց կատարմամբ արագ գոլը կարող է վճռորոշ դեր խաղալ: Բայց արդեն հիմա էլ պարզ է, որ Լիխտենշտեյնը հիմնականում պաշտպանվելու է: Թիմը դավանում է 3-5-2 մարտավարությունը, ինչ Լիխտենշտեյնի ֆուտբոլիստների կատարմամբ ուժեղ պաշտպանություն է ենթադրում:
Վարդան Մինասյանը Հայաստանի հավաքականի խաղերում հիմնականում կիրառել է 4-2-3-1 մարտավարությունը: Սակայն այս ամեն ինչը կառուցվում է ըստ ֆուտբոլիստների: Այսինքն` նայած թե ում նախապատվություն կտա մարզիչը մեկնարկային կազմում տեսնելու, ըստ դրա էլ կկառուցվեի մեր ընտրանում և՛ խաղը, և՛ մարտավարությունը: Պարզ է, որ Հայաստանի հավաքականի ամբողջ կազմը շատ լավ հասկանում է, որ այս խաղում միայն պետք է հաղթել ու մրցակիցը ուժեղներից չէ: Այս առումով մեր թիմի տղաների ուսերին շատ մեծ պատասխանատվություն ու ճնշում կա: Բայց անկախ ամեն ինչից, բոլորս էլ սպասում ենք հաղթական մեկնարկին:
Լիխտենշտեյնի թիմի նկատմամբ հաղթանակը կրկնակի նշանակություն ունի: Սեպտեմբերի 6-ին նույնիսկ ոչ-ոքի հաշիվն անհաջողություն կհամարվի: Իսկ երեք օր անց մեր ընտրանուն սպասում է խմբային փուլի հիմնական մրցակցի՝ Մակեդոնիայի հետ խաղը: Այսինքն` պետք է հաղթել ու նույն տրամաբանությամբ էլ նույն արդյունքին սպասել հաջորդ խաղին: Սպասենք ու թող հաղթանակը ուղեկցի մեր հավաքականին: