ԵՐԵՎԱՆ, 31 օգոստոսի — Sputnik. Ադրբեջանի ԱԳՆ-ում մեկնաբանել են ՀՀ ԱԳՆ պաշտոնական ներկայացուցիչ Աննա Նաղդալյանի հայտարարությունը, որը կապված էր Ադրբեջանի` ՀԱՊԿ-ին անդամակցելու մտադրության հետ։
«Հայաստանը ՀԱՊԿ-ի միակ անդամը չէ, ՀԱՊԿ անդամ այլ պետություններ ևս կան», — haqqin.az-ի հետ զրույցում ասել է Ադրբեջանի ԱԳՆ մամուլի քարտուղար Հիքմեթ Հաջիևը։
Ադրբեջանի խորհրդարանի իրավական քաղաքականության և պետականաշինության հանձնաժողովի նախագահ Ալի Հուսեյնլին ավելի վաղ հայտնել էր, որ «նոր աշխարհաքաղաքական պայմաններում կարելի է դիտարկել Ադրբեջանի մասնակցությունը ՀԱՊԿ-ում»։
Աննա Նաղդալյանը, ճեպազրույցի ժամանակ մեկնաբանելով այս տեղեկությունը, ընդգծել էր, որ եթե ՀԱՊԿ-ին Ադրբեջանի անդամակցության հարց լինի, Հայաստանը կօգտվի վետոյի իր իրավունքից։ Նա նաև նշել էր, որ ՀԱՊԿ-ում և ԵԱՏՄ-ում որոշումները կայացվում են բացառապես կոնսենսուսի հիման վրա։
Նույն օրը ՀԱՊԿ-ը հաղորդագրություն էր տարածել, որում հստակ գրված էին կազմակերպությանն անդամակցելու պայմանները։ Փաստաթղթում, ամենից զատ, որպես ՀԱՊԿ-ին անդամակցելու անհրաժեշտ պայման նշվում է Կազմակերպության բոլոր անդամ-պետությունների հետ դիվանագիտական հարաբերությունների առկայությունը։
Նշենք, որ ավելի վաղ ստեղծվել էր ՀԱՊԿ-ին առընթեր դիտորդի և գործընկերոջ կարգավիճակով ներկայացուցչություն։