ԵՐԵՎԱՆ, 29 օգոստոսի — Sputnik. Ֆրանսիացի և բրիտանացի ձկնորսները վիճել են Լա Մանշի նեղուցում որս անելու վայրում ճիշտ սահմանները որոշելու պատճառով։ Միջադեպի մասին հայտնում է BFMTV հեռուստաընկերությունը։
Բախման տեսանյութը հրապարակվել է համացանցում։
Նորմանդիայի ծովային պրեֆեկտուրայի ներկայացուցիչը հայտնել է, որ նեղուցում 35 ֆրանսիական և 5 բրիտանական նավեր են հավաքվել։
Սկզբում ֆրանսիացիները փորձել են պարզապես խանգարել անգլիացիներին և քարեր են նետել նրանց ուղղությամբ։
Տուժածներ չեն եղել, բայց ֆրանսիացիները կարողացել են շրջապատել վաղեմի «թշնամիներին»։ Անգլիացիները ստիպված են եղել հեռանալ։
Նորմանդիայի ձկնորսների տարածաշրջանային կոմիտեի ղեկավար Դիմիտրի Ռոգոֆը պարզաբանել է, ֆրանսիացի ձկնորսների համար ժամանակային առումով խիստ սահմանափակումներ են սահմանվել, նրանց թույլ են տալիս ձուկ որսալ հոկտեմբերի 1-ից մինչև մայիսի 15-ն ընկած ժամանակահատվածում։ Այդ պատճառով նրանք անգլիացիներից պահանջում են պահպանել ձկնորսության սահմանները հարկադրված պարապուրդի ժամանակ։