ԵՐԵՎԱՆ, 29 օգոստոսի — Sputnik. Հայաստանում 2018 թվականի ամռանը էլեկտրաէներգիայի ներքին սպառումը հասել է աննախադեպ մակարդակի: Այս մասին այսօր լրագրողներին ասաց ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը։
Տարվա սկզբին էլեկտրականության սպառման անկում էր գրանցվել, ինչը կապված էր անոմալ տաք ձմռան հետ։ Իսկ ահա ամառը շոգ է, այդ պատճառով սառնարաններն ու օդորակիչները ամբողջ ուժով են աշխատել։
Այնուամենայնիվ, էլեկտրականություն ներկրելու անհրաժեշտություն գրեթե չի եղել նույնիսկ պլանային վերանորոգման ժամանակ` Հայկական Ատոմակայանի աշխատանքի ժամանակավոր դադարի ֆոնին։ Նշենք, որ երևանյան ՋԷԿ–ն էլ հիմա պլանային վերանորոգում է անցնում։
Նախարարն ընդգծեց, որ երկրի էներգահամակարգը կարողացել է լրացնել այդ հզորությունն ու ապահովել բոլոր սպառողներին։
Հիշեցնենք` 2017 թվականին Հայաստանում 5 միլիարդ 620 միլիոն կՏտ.ժամ էլեկտրաէներգիա է սպառվել։ Դա մոտ 5,5%–ով գերազանցում է 2016 թվականի ցուցանիշը։