ԵՐԵՎԱՆ, 29 օգոստոսի — Sputnik. ՀՀ կառավարությունն ուզում է նոր պայմաններ առաջարկել արևային կայանների կառուցման համար։ Այսօր հրավիրված ասուլիսի ժամանակ այս մասին լրագրողներին ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը։
«Առաջարկություն կներկայացնենք ՀԾԿՀ-ին, որ մինչև 2020 թ. հունվարի 1-ը 100 մեգավատտ գումարային հզորությամբ արևային կայաններ կառուցվեն»,- ասաց նա։
Մասնավորապես, մինչև հինգ մեգավատտ տեղակայվող կայանների համար կսահմանվի բնական ջրահոսքերի վրա կառուցված ՀԷԿ-երից առաքվող էլեկտրաէներգիայի սակագնին հավասար սակագին` 23,8 դրամ (առանց ԱԱՀ)։ Սա ավելի քիչ է, քան նախկինում։ Առաջին 10-ը արևային կայանները (1 ՄՎտ հզորությամբ) 42,6 դրամ սակագին էին ստացել 1 կՎտ/ժ-ի դիմաց։ Սակայն 23,8 դրամն էլ ամենաբարձր սակագներից է հանրապետության էլեկտրակայանների համար։
«Սա ինչ վերաբերում է մինչև 5 ՄՎտ կայաններին։ Իսկ ավելի խոշորների համար սակագինը կհաստատվի ներդրողների հետ բանակցությունների արդյունքում», — ասաց նախարարը։
Հիշեցնենք, որ Հայաստանում արդեն սկսել են իրականացնել 1 ՄՎտ հզորությամբ արևային 10 կայանների շինարարությունը։
2018 թվականի հուլիսին էներգետիկայի նախարարությունը համաձայնագիր է ստորագրել ավելի խոշոր կայանի` 55 ՄՎտ հզորությամբ արևային «Մասրիկ-1» էլեկտրակայանի շինարարությանն աջակցելու համար։ Կայանի շինարարությունն իրականացնելու է նիդեռլանդա-իսպանական կոնսորցիումը։ Միջազգային տենդերի ժամանակ ՀՀ էլցանցերի համար նրանք ամենացածր գինն էին առաջարկել` 1 ԿՎտ/ժ-ի դիմաց ընդամենը 4,2 ցենտ (մոտ 20 դրամ)։
Բացի այդ, հանրապետությունում մինչև 150 ԿՎտ հզորությամբ արդեն մի քանի տասնյակ ավտոնոմ արտադրող կա։ Դրանք տնային տնտեսություններն են ու փոքր բիզնեսը, որոնք սեփական կարիքների համար արևային վահանակներ են տեղադրում իրենց տանիքներին։
Այդուհանդերձ, արևային կայանները Հայաստանում էլեկտրաէներգիայի արտադրության միայն 0,007%-ն են կազմում (2017 թվականին մոտ 540 հազար ԿՎտ/ժ)։