ԵՐԵՎԱՆ, 28 օգոստոսի — Sputnik. ՀՀ երկրորդ նախագահ Ռոբերտ Քոչարյանը կարծում է, որ նրա հետնորդը` Սերժ Սարգսյանը լուրջ սխալ թույլ տվեց`նախաձեռնելով սահմանադրական փոփոխությունները։
Այս մասին Քոչարյանն ասել է NTV հեռուստաալիքին տված հարցազրույցում` մեկնաբանելով Հայաստանի «թավշյա հեղափոխության» պատճառները։
«Իհարկե, ես վերլուծել եմ Հայաստանի իրադարձությունները։ Կարծում եմ նա (Սարգսյանը –խմբ.) չպետք է նախաձեռներ սահմանադրական բարեփոխումները», – նշել է Քոչարյանը, հավելելով, որ ժամանակին հրապարակայնորեն քննադատել է սահմանադրական փոփոխությունները։
Նախկին նախագահը նշել է, որ Սարգսյանը չպետք է փորձեր երկարացնել իշխանությունը` վարչապետի աթոռը զբաղեցնելով։
Հիշեցնենք` զանգվածային բողոքի ակցիաները Հայաստանում սկսեցին այն բանից հետո, երբ Սարգսյանը զբաղեցրեց վարչապետի պաշտոնը։ Փողոցի ճնշման տակ ապրիլի 23–ին Սարգսյանը հրաժարական տվեց։