ԵՐԵՎԱՆ, 28 օգոստոսի — Sputnik. Բիդգոշչ լեհական քաղաքում բնակվող հային կարող են դատել թրաֆիքինգ իրականացնելու համար։ Այս մասին հայտնում է լեհական Gazeta Wyborcza պարբերականը` հղում անելով Բիդգոշչի ոստիկանական պարետատանը։
Հայից բացի, մարդկանց հավաքագրելու համար կասկածում են Բիդգոշչից քիչ հեռու գտնվող Ինովրոցլավ քաղաքում ապրող երկու կանանց։ Երեքն էլ ձերբակալված են, առաջիկայում նրանց կհարցաքննեն։
Նրանց բռնել են հանցանքի վայրում` քաղաքի Սպորտի պալատի մոտ, որտեղ երկու ավտոբուս է եղել։ Նրանք պետք է 70 մարդու տեղափոխեին Արևմտյան Եվրոպա խաղող հավաքելու համար։
Առաջին ցուցմունքը տվել է մի կին, որն այնտեղ էր մեկնել որդու հետ։ Ոստիկանությունում կինը հայտնել էր, որ աշխատակիցներին ծանր պայմաններում էին պահում, կոպտորեն վերաբերվում և ստիպում դժվար աշխատանք կատարել։ Աշխատանքի դիմաց նրանց լավագույն դեպքում վճարում էին խոստացված գումարի մի փոքր մասը, վատագույն դեպքում` ընդհանրապես չէին վճարում։
Մարդկանց հավաքագրում էին համացանցի միջոցով։ Խարդախների զոհերի թիվը հարյուրների է հասնում։ 70 մարդ, որոնք չեն հասցրել լքել երկիրը, այդ գործում կներգրավվեն որպես վկա։
Առայժմ մեղադրանք կառաջադրեն երեք անձի։ Քննիչները չեն բացառում, որ սա կարող է վերաճել մարդկանց վաճառքի գործի։